Гьар йыл апрель айда Къаягент районда «Шатлыкъ» деген милли маданиятны ва фольклорну фестивалы оьтгериле. Дагъыстанны маданият министерлигини, Республика халкъ яратывчулукъ уьюню ва Къаягент районну маданият управлениесини сиптечилиги булан юрюлеген фестиваль Агьлюню йылына багъышлана.

 

Шо фестивальда савлай республиканы районларындан гелген коллективлер милли бийивлерин, йырларын, милли музыка алатларын ва инчесаниятын гёрсете. Озокъда, бийийгенлер оьзлени пагьмусун, йыр-лайгъанлар бажарывлугъун аян эте, инчесаниятдагъылар оьз­лер этген малланы ярмакюсюн юрютелер. Оьтген 7 йылны ичинде шолай фес-тивалларда ортакъчылыкъ этгенлени бирлери бугюнлерде тастарлар согъув, милли опуракъланы тигив яда милли согъув алатлар этив булан  машгъул болуп, харж къазанагъанлары да бар.

Къаягент райондан бу йыл фестивальда 10 юртну коллективлери ортакъчылыкъ этди. Олар ачыкъ кёкню тюбюндеги музей йимик, алдын ерлиги адамлар къоллагъан савутланы, халча-халилени, милли опуракъланы ва согъув алатланы выс­тавкаларын да оьтгерди. Шолай да фестивальда ерлерден гелгенлер оьз­лени милли ашларын да этелер,  къонакълагъа шоланы татывуна къарама таклиф этиле.

Фестивальда ортакъчылыкъ этген районну башчысы Магьаммат Элдерханов шулай чаралар оьсюп гелеген наслугъа  милли маданиятны, милли саниятларыбызны, адатларыбызны, ана тилибизни унутма къоймай сакълама кёмек этегенни айтды.

– «Шатлыкъ» деп фестивальгъа ат тагъылгъаны да негьакъ тюгюл, шулай чаралар гьар адамны юрегине шатлыкъ бере, сююнч гелтире, шо буса бугюнлерде гьар адамгъа тарыкъ гьис, — дей М.Элдерханов.

Бу йылгъы фестивальда да ерлерден гелген артистлер жыйылгъанлагъа оьзлени оьзтерече пагьмуларын гёрсетди. Гьар миллетни тили башгъа йимик, маданияты да башгъа. Булай фес­тивалларда унутулуп барагъан халкъ йырлары булан бирге, арт вакътилерде язылып алынгъан ва арагъа чыкъгъан бырынгъы йырлар да йырлана.

Жыйылгъанлар яшланы «Даки» деген коллективини бийивюн ва «Къаягент» деген эргишилени хорун харс уруп къаршыладылар.

Къарабудагъгент райондан гелген чебер иш гёрсетеген коллективлер де оьзлени пагьмуларын гёрсетди.

Фестивальда ортакъчылыкъ этгенлеге дип­ломлар ва эсделик савгъатлар тапшурулду.

 

Бизин мухбирибиз.

СУРАТДА: Къарабудагъгентден гелген А. Къаплановну атындагъы хорну чыгъышы.