10-нчу январда Дагъыстанны Башчысы С. Меликов районну башчысы Магьаммат Элдерханов ва жаваплы къуллукъчулар булан хас асгер гьаракатда жанын берген гьюсемегентли Мурат Закарьяевни агьлюсюнде болгъан, ата-анасы Закарья ва Жарият булан ёлукъгъан.
Мурат юртдагъы школаны охуп битгенде, Дагъыстан пачалыкъ университетде охугъан. Асгерге 2013-нчю йылда чакъырылгъан. Къайтгъанда туснакъланы сакълав къуллукъда ишлеген. Гиччиден берли асгерчи болма сюеген Мурат, 2019-нчу йыл дыгъар этип, асгер къуллугъун башлагъан. Оьтген заманны ичинде бир нече керен асгер гьаракатларда ортакъчылыкъ этген. Россиягъа къошулгъан янгы регионланы адамларыны аманлыгъын болдурмакъ учун биринчи гюнлерден тутуп ал сыдыраларда асгер борчун кютюп тургъан.
Къоччакълыкъны ва игитликни белгисин алгъан Мурат асгер ёлдашларын оьлюмден къутгъарагъанда, 2022-нчи йыл 27-нчи февральда гечинген. Ол оьлгенден сонг Къоччакълыкъны ордени булан савгъатлангъан, юртундагъы орамгъа ону аты къоюлгъан.
– Озокъда, уланыгъызны къайтарма болар гюч ёкъ, тек арадан заман гетсе де шунча адамны эсинде экени, ол къысгъа буса да ярыкъ оьмюр сюргени ачыкъдан гёрюне. Ол оьзю гечинсе де, башгъа адамланы оьлюмден къутгъаргъаны – бизин учун уллу оьктемлик. Ону аты даимликге адамланы эсинде къалажакъгъа шеклик ёкъ, – деген С.Меликов.
Шондан сонг Сергей Меликов Къаягентде ва районну юртларында ерлешген яшавлукъ ва спорт идараларда болгъан. Милли проектлеге гёре къурулгъан Янгы Викридеги школаны, Янгы Къаягентдеги 250 яшгъа этилинген яшлар бавуну сан янын тергеген. Герга юртда 300 яшгъа деп къурулагъан школада ишлер юрюлеген кюйге разисизлигин билдирген.
Сергей Меликов Игитлени бавун ачагъанда ортакъчылыкъ этген ва хас асгер гьаракатда ортакъчылыкъ этегенде гечингенлени агьлюлери булан ёлугъув оьтгерген.
Бизин мухбирибиз.
