БИЗИН МАЪЛУМАТ:
Жанакъаева Найида Хизриевна Буйнакск районну Тёбен Къазаныш юртунда 1966-нчы йылда тувгъан. 1983-нчю йыл юртдагъы 2 номерли орта школаны охуп битдирген сонг ол Дагъыстан медицина институтгъа тюше. Интернатураны да уьстюнлю кюйде тамамлагъан Найида Жанакъаева 1994-нчю йылдан тутуп Янгы Къумукъ юрт участка амбулаторияда врач болуп ишлеме башлай. 2004-нчю йылда мунда участка больница ачыла. Найида Хизриевна эсгерилген больницаны баш врачы этилип белгилене ва бугюнлеге ерли шо борчларын бажарывлу кюйде кютюп де тура.
Найида Хизриевна савлукъ сакълав тармакъда ишлейген 30 йылны боюнда бир нече керенлер гьюрметлев грамоталар булан савгъатлангъан. Ону уьягьлюсю, уьйленген эки авлети ва оьсюп турагъан торунлары бар.
Найида Хизриевна булан ёлугъуп ишини гьакъында лакъыр этме башлагъандокъ да мен ол артыкъ кёп сёзню еси тюгюл экенни англадым. Мени соравларыма ол къысгъа, маъналы ва англашылагъан къайдада жавап къайтарып турду.
– Сизин тухумда адамланы савлугъуну гьалын билеген эмчилер багъымчылар, докторлукъ касбуну юрютегенлер алда да болгъандыр. Сизге врачны касбусун тангламакъгъа ким себеп болду?
– Тухумубузда эмчилер, багъымчылар ёкъ эди, бизинкилер кёбюсю гьалда муаллимни касбусун танглап ишлей эдилер. Магъа етишгенде улланабыз: «Халкъгъа тарбия булан билим берегенлерибиз таман чакъы бар. Бизден де бирев савлугъубузну гьайын этеген адам болса кимге заралдыр!» – деп чорт гесип къойду. Муаллим касбуну башын тутма гьасирет болсам да, улланабызгъа къаршы чыкъма тавакаллыкъ этмедим.
– 2004-нчю йылда Буйнакск районну о замангъы башчысы Магьаммат-Расул Алхлаевни къасты булан ачылгъан участка больница толу кюйде ярашдырылгъан, янгыртылгъан сонг алда администрация болгъан бинада ерлешген эди бугъай…
– Тюз айтасыз. Оьтген 15 йылланы ичинде больницагъа айландырылгъан бина юртну халкъына арив къуллукъ этип турду. Тек нетерсен, 2019-нчу йыл болгъан ер тербенивню натижасында шо бина адам гирме де, турма да ярамайгъан гьалда бузулгъан эди. Шо заман коронавирус яйылып турагъан вакътилер де дюр эди. Бизге районну баш врачы Батыр Мухтарович булан гьакълашып, больницаны ябып къоймайлы, Буйнакск шагьаргъа гёчюрюп ишлеме ёл табулду. Эсги бинаны кюрчюсюнден бузуп тайдырып, заманны янгы талапларына жавап береген къурулуш къайдаланы къоллап, ким-ким де сукъланар йимик больницаны эки къабат бинасын тургъузма да болдукъ. Биринчи къабатында поликлиника, экинчисинде буса стационар ерлешген.
– Гертиден де, больницаны бинасыны ерлешген кюю онгайлы, гёрюнюшю де бек арив… Юртлуланы не йимик къуллукъларын кютмеге боласыз?
– Бизде бар терапия, педиатрия, гинекология, УЗИ, стоматология, рентген, физкабинетлени ишин 8 врач ва 14 медсестра юрюте. Стационар бёлюкде 15 аврувгъа ятма онгайлы ерлерибиз де бар. Дарманлар булан таъминлигибиз де яхшы. Бизге кёмек ахтарып гелегенлени арасында юреги, нервалары авруйгъанлар, давлениесинден инжинегенлер айра да кёп. Шолай авруву болуп гелгенлеге биз тийишли болагъан кёмегибизни болдурма къарайбыз. Эгер де кёмек этип болмайгъаныбызны билсек, аврувуна къаратмакъ учун оланы гьазиринде гьар тюрлю касбучу-врачлар ишлейген стационарлагъа йиберебиз.
Ким нелер айтып къойса да, гьар адам оьзюню савлугъуна оьзю жавап бере. Шону учун санларында бир тетиги яда авруву барны эс этгенде, ондан арчылывну ёлларын башлап оьзю ахтармагъа да герек. Дагъы ёгъесе, янгурну артындан ямучу алып чапгъанда йимик бола.
– Найида Хизриевна, сизде ишлейген медицина къуллукъчуланы гьакъында да бир-нече сёз айтсагъыз сюер эдим.
– Мен ишлеме башлагъан гюнден тутуп, яннавурумда болуп аврувланы авур къуллукъларын да, намусларын да кютюп турагъан бажарывлу медсестралар Бектемирова Нуриятны, Алхлаева Найиданы, Далгьатова Зайнапны, Магьамматова Патиматны, Гьашимова Мадинатны, старшая медсестра Илякъаева Нюржанны атларын гьюрмет булан эсгеремен. Бизин ишибизге четимлик этеген бир кемчилик бар буса, шо да амбулаторный аврувланы ташыйгъан машинибиз эсги болуп турагъанлыкъ.
– Авлетлеригизни арасында, балики, медицина къуллукъчуну касбусун танглагъаны бардыр!..
– Ёкъ! Олар да башгъа касбуланы башын тутгъанлар. Уланыбыз Рустам Москвада – инженер-къурувчу, къызыбыз Нурият Магьачкъалада юрист болуп ишлей.
– Бизин булан лакъыр этме рази болгъаныгъыз учун кёп савболугъуз.
– Сизге де баракалла.
Казим КЪАГЬРУМАН.
СУРАТДА: Янгы Къумукъдагъы участка больницаны баш врачы
Н. Жанакъаева.
