ДР-ни Гьукуматыны премьер-министри Абдулмуслим Абдулмуслимов оьтгерген генгешни барышында республиканы савлукъ сакълав министри Татьяна Беляева Украина бойда юрюлеген асгер гьаракатгъа къуршалгъанланы, оланы агьлюлерини ва ювукъ дос-къардашыны медицина къуллукъларын кютювге байлавлу алгъа салынгъан борчлар нечик кютюлегени гьакъда баянлыкъ берген.
Татьяна Беляева билдиргени йимик «Ватанны якълавчулары» деген фондуну ерли бёлюгюню ва савлукъ сакълав министерлигини вакиллери разилешивге къол салгъан. Шо разилешивге асасланып, бизин республикада беш медицина идараны касбучулары, демек, врачлары ва психологлары оланы аврувларын багъа, олай да савлугъун беклешдиривню оьзлеге борч этип алгъан. Шо ишлер де «Пачалыкъны янындан якълав» деген программаны гесимлерине кюрчюленип кютюле.
Гетген йыл Украина бойда юрюлеген хас асгер гьаракатгъа къуршалгъанланы арасындан 46 адам бизин республиканы медицина идараларында савлугъун беклешдирген. Оланы ювукъ дос-къардашын да гьисапгъа алгъанда, савлугъун беклешдиргенлени санаву 186 адамгъа етише.
Шо гьакъда айта туруп, Дагъыстанны Башчысы Сергей Меликов бизин республиканы парламентине 2023-нчю йылда этген Чакъырыв кагъызында артгъа салмайгъан кюйде Украина бойда юрюлеген асгер гьаракатгъа къуршалгъанланы, олай да жанлары къыйылгъанланы агьлюлерини ва ювукъ доскъардашыны медицина къуллукъларын кютмекни гьакъында тапшурув бергенин гене де эсигизге салмакъны да тийишли гёребиз.
Н. БАЙБОЛАТОВ.
