Алдагъы гюнлерде Къарабудагъгент районну Манасгент юртундагъы орта школасында билим алагъан яшлар булан Интернетдеги жамият торларында юрюлеген экстремист гьаракатны айланасында лакъырлашыв оьтгерилген.
Эсгерилген охув ожакъны оьр класларында охуйгъан уланлар ва къызлар къуршалгъан шо гьаракатда Къарабудагъгент районну билим берив управлениесини аманлыкъгъа къарайгъан бёлюгюню ёлбашчысы, жагьиллени парламентини депутаты О.Гьамитов, олай да яшланы ва яшёрюмлени ишлерине къарайгъан, оланы ихтиярларын якълайгъан комиссиясыны жаваплы секретары М. Жалилов ортакъчылыкъ этген. Къарабудагъгент районну Telegram-каналында билдирилеген кюйде, шо ёлугъувну барышында артдагъы вакътилерде экстремист гьаракатны алдын алывну агьамиятлыгъы артып тербейген масъаланы чечивню ёлларына байлавлу пикрулар малим этилген. Яшлагъа Интернетни имканлыкъларындан пайдаланагъан вакътисинде сакъ болмагъа тюшегени гьакъда айтылгъан. Тарыкълыларын ва пайдалыларын къалп маълуматлардан айырмагъа уьйренмеге тюшегени гьакъда англатыв берилген.
Насрулла БАЙБОЛАТОВ.
