Яртыбилек

 

Бир гюн эртен уяндым

Авазына мишикни.

Мавуллай къолун къысып,

Арасында эшикни.

 

«Бу да не мишикдир?» – деп,

Сорав гелди башыма.

Болгъан экен шо бишев

Дамагь этген ашыма!

 

Ашгъа чакъырмакъ учун

Огъар ат къойма герек.

Сутурлугъу саялы

Болду ол Яртыбилек…

 

Балыкъны, этни энни

Эки бёлюп ашайбыз.

Шо гюнден берли бирче

Къурдаш болуп яшайбыз.

 

Гьайсызлыкъ

 

Яй гюню. Эртен туруп,

Тез сагьатгъа къарадым.

Геч болмайым деп ойлап,

Узун чачым тарадым.

 

Тез етдим школагъа,

Расписание ташлангъан.

Эшикге де язылгъан:

«Каникуллар башлангъан».

 

Уьйге мен къайтдым ойнай,

Портфелим оьрге чююп.

Гьайсызлыгъыма артда

Ачувландым къаш тююп.