Ерлерден хабарлар
Герменчик
Бугюнлерде Бабаюрт районну Герменчик юртунда шатлы агьвалат болду. Герменчиклилер Украина бойдагъы хас асгер чараларда ор-такъчылыкъ этип, Ватаныны алдындагъы борчун намуслу, къоччакъ кюйде кютюп гелген Билал Ильясовну къаршылагъан.
Билалны ювукъ адамлары, къурдашлары машинлер булан ону юртдан кёп ариде алдына чыкъгъан. Герменчикге гиреген орамны эки де ягъына халкъ жыйылгъан. Олар оьзлени батырын сабурсуз къаравуллагъан. Машинлер ювукъ болгъанда, жагьиллер ортагъа бийиме чыгъа. Билалны гиччи де, уллу да аралагъан, гьариси къолун алма, къучакълама талпына. «Билал Ильясов – Ватаныны ва халкъыны герти патриоту. Биз ону къаршыламай болмай эдик. Яш наслубуз ондан уьлгю алажагъына бир де шекленмеймен», – дей юртну башчысы Магьач Батырханов.
Оьзю Билалгъа узакъ да къалмай 60 йыл битежек. Чагъына да къарамай, Ватаны «гьайт» дегенде, «вайт» деп, къолуна савутну да тутуп хоншу уьлкеде баш гётерген фашизмге ва ону якъчыларына къаршы чыкъгъан.
Шондан алда Адил Янгыюртда да оьзлени асгерчи юртлусу Марат Гьажиевни шатлы кюйде къаршылагъанлар. Бугюн Украина бойда савутлу гючлерибизни сыдрасында къуллукъ этегенлени барысына да уьйлерине, агьлюлерине эсен-аман, сав-саламат къайтмагъа насип болсун!
Эндирей
Эндирейдеги 3 номерли школаны кюрчюсюнде яшёрюмлени арасында шашка оюндан районну чемпионаты оьтгерилген. Ярышлар Уллу Уьстюнлюкню 78 йыллыгъына багъышлангъан ва олимпия къайдада юрюлген. Демек, утдургъан команда чемпионатдан тая.
Турнирни вакътисинде финалгъа етишгенче Сивух орта школаны шашка оюнчулары Нурадиловону, Бамматюртну, Ботаюртну, Первомайскоени жыйым командаларын утгъан. Финалда буса Янгы Саситлини командасындан уьст гелип, биринчи ерни алгъан. Уьчюнчю ерни Къандавуравулну яшёрюмлери къазангъан. Алдынлыкъны алгъанлар гьюрметлев грамоталар, медаллар ва сыйлы савгъатлар булан белгиленген.
Сивухну шашка оюнчулары республиканы чемпионатында ортакъчылыкъ этежек.
Солтан Янгыюрт
Солтан Янгыюртда Украина бойдагъы асгер чараларда жанын къурбан этген, Къоччакълыкъны ордени булан савгъатлангъан Магьаммат Сотавовну аты къоюлгъан бавда ерли жамиятны гючю булан янгы тереклер орнатылгъан. Бу бавгъа «Эсделикни баву» деп де айтыла.
Терек орнатывда Къызылюртдагъы дав агьвалатланы ортакъчыларыны бирлешивюню председатели Дада Гьажиев, хас асгер чараланы ортакъчылары Абдулмуталим Абуков ва Руслан Муратов, Солтан Янгыюрт администрацияны башчысы Арзулум Шамхалов, ерли 2 номерли орта школаны директору Шамил Абдулахидов ва оьзгелери ортакъчылыкъ этген.
Жыйылгъанланы алдында Д.Гьажиев чыгъып сёйлеген. «Янгыз биз тюгюлбюз шу гьаракатны башлагъан. Аз заманны ичинде бютюн уьлкеде 100 миллиондан артыкъ терек орнатылгъан. Озокъда, Къызылюрт районну да оьзюню игитлери бар бизин ата-бабаларыбызгъа йимик оьзлеге гьюрмет де, абур да этмеге тюшеген. Бизин районну гьар тюрлю юртларындан чыкъгъан 14 игит улан пачалыкъны оьр савгъатларына ес болгъан. Оланы атлары Россияны тарихинде даимге къалажакъ», – деген ол.
Къоркъмаскъала
Бютюндюнья агьамияты булангъы табиат эсделик деп гьисапланагъан Сарихумгъа гьар йыл юз минглер булан туристлер геле. Бу йыл оланы санаву дагъы да артмакъ бар.
Гьали-гьалилерде районну башчысы Айнутдин Зиявутдиновну сиптечилиги булан тёбени айланасында субботник оьтгерилген. Инг алдын «Кавказ» федерал ёлдан Сарихумгъа ерли 4 чакъырым ёлну ёрукъгъа гелтирмекге айрыча тергев берилген. Янгурлардан сонг бу ёл оьтюп болмасдай батмакълыкълагъа айлана. Шо саялы субботниклени йылда бир нече керен оьтгермеге тюше.
Районну башчысы Дагъыстанны транспорт министерлигинден ёлну оьзлени балансына алып, асфальт тутмакъны тилеген. Тек гьалиге министерликден жавап гелмеген.
Тёбен Жюнгютей
Тёбен Жюнгютейдеги школаны охувчу къызы Женнет Насрутдинова «Ана сёз» деген Бютюнроссия фестивальны 2-нчи даражалы диплому булан савгъатлангъан. Ол конкурсгъа Сергей Алексеевни «Солдат юрек» деген шиърусун гёнгюнден охуп, видеороликни бакъдыргъан болгъан.
Фестиваль белгили орус алим, язывчу, уьлкеде педагогиканы кюрчюлерин биринчилерден салгъан Константин Ушинскийни юбилейине багъышлангъан. Бу йыл ол тувгъанлы 200 йыл тамамлана. Фестивальны Москвадагъы шагьар педагогика университет оьтгере.
11-нчи класны охувчусун фестивальгъа орус тил ва адабият дарсланы муаллими Умхайыр Мегьтиева гьазирлеген. Женнетни къутлай туруп, дагъы да уллу уьстюнлюклеге етишмекни ёрайбыз!
Янгыкъаягент
Янгыкъаягентдеги маданият центрда мердешли маданиятны ва фольклорну «Шатлыкъ» деген республика фестивалы оьтгерилген. Уллу милли байрамда районну бары да юртларыны вакиллери ортакъчылыкъ этген.
Юртланы къайсын алып къарасанг да, гьарисини оьзтёрече мердешлери, йырлары, бийивлери бар. Къаягент район оьзлени маданият варислигине айрыча тергевлю янаша ва ата-бабаларындан къалгъан инчесаниятны, фольклорну къоруп сакъламакъны бек гьайын эте.
«Фестивальны программасына гёре, бырынгъы савут-сабаны, гьар тюрлю алатланы, опуракъны, халкъ усталаны выставкалары оьтгериле. Ондан къайры, сюйген адам бизин ашларыбызны татывуна да къарама бола», – деп хабарлай районну маданият управлениесини башчысы Умукюсюм Агъаева.
Фестивальда эргишилени «Къаягент» хору, « Асхар» деген бийив ансамбли, йырав Жамиля Байрамова оьзлени пагьмуларын гёрсетген ва жыйылгъанланы къурчун къандыргъан.
