Базар аралыкълар оьмюр сюреген девюрде юрт ерлерде хозяйство ишлерде далапчылыкъ булан машгъул болагъан тайпалар экономиканы яшыртгъын тармагъына бойсынагъаны аянлашдырыла бара демеге ярай. Шолайлыкъда, бизин респуб­ликабызда болдурулагъан юрт хозяйство продукцияны гьисабын юрютювню низамы да бузула­гъаны гьакъ. Мал болдурагъанлар ва къуллукъланы яратагъанлар тюпден таба иш гёрегени саялы айлана ягъыбызда ич ва тышдагъы къоллавчуланы талапларын кютювде четимликлер де кем болмай.

 

Къызгъанчы эки керен утдура деп айтылагъаны гьакъда унутма тюшмей. Неге десегиз, экономиканы яшыртгъын тармагъына бойсынагъан тайпалар пачалыкъ кёмекден магьрюм къала.

Гьали-гьалилерде ДР-ни Гьукуматыны Председателини заместители Нариман Абдулмуталибовну тапшурувуна гёре Дагъыстанны юрт хозяйство ва сурсат министрини заместители Хирамагьаммат Муртазалиев ишчи сапары булан Буйнакск райондагъы къумукъ юртларда болгъан. Ишчи сапарда ону булан бирче  эсгерилген министерликни экономика ва финанс управлениесини начальниги Гьажимурат Энхов, ДР-ни агропромышленный комплексини оьсдюрюв центрыны директору Шамил Гьитинов ва шолай да Буйнакск районну юрт хозяйство управлениесини начальниги Магьаммат Гьажимурзаев болгъанлар.

Ишчи сапарны барышында юрт муниципал къурулувларында хозяйство ишлерде гьисап юрютюв ишлени салынгъан кююн тергевге алгъан ва хозяйство китапларда йиберилген кемчиликлеге гёре пайдалы таклифлер берген. Тёбен Жюнгютей, Буглен, Капир Къумукъ ва Халимбекавул юрт муниципал къурулувларыны башчыларына айрыча буварыв этилген. Хирамагьаммат Муртазалиев гьисап юрютюв ишлер башалман кюйде юрюлегенине байлавлу болуп оьзюню разисизлиги гьакъда айрыча эсгерген.

–  Савлай республикабызда юрт ерлерде гьисап юрютюв ишлер низамгъа салынма тарыкъ, кемчилик­лер йиберилгени саялы хозяйство ишлени гьакъында толу маълумат ёкъ, – деген ол ишчи сапарыны гьасилин чыгъара туруп. – Муна шо саялы да, юртлардагъы абзар агьлю хозяйстволагъа (ЛПХ) пачалыкъны янындан картоп, овощлар оьсдюрегенлерине ва шолай да емге тутулгъан гьайван-малына  пачалыкъны янындан гёрсетилинеген субсидиялардан пайдаланмагъа бажарылмай. Кемчиликлерден дарс алып, юрт хозяйство ишлени асувлугъуна зиян болагъаны гьакъда генг кюйде гьакълашып тийишли чараланы гёрсек пайдалы болур.

 

Къ. КЪАЗАКЪМУРЗАЕВ.