Март айны 15-де Ногъай районну Терекли-Мектебдеги район судундан  чыгъып гелегенде  Владимир Григорянц ва ону адвокаты Сергей Осипов оьлтюрюлгенлер.  Олагъа уланын тас этген ерли адам тапанча булан атышгъан.

 

Шо гюн судда 2023-нчю йылны май айыны 19-нда болгъан агьвалатлагъа къарала болгъан. В.Григорянц «Мазда» маркалы машинин бек чалт гьайдап, ёл ягъада мопед булан токътагъан 14 йыллыкъ Мирзабекни уруп йыкъгъан.  Ол азарханагъа етишгенче эсине гелмей оьлген.

Мирзабекни агьлюсю бираз алда гиччи Ватанына Норильскиден гёчген болгъан. В.Григорянц буса, – Къызлар шагьарны алдагъы прокурору Саркис Григорянцны уланы.

Район суд 14 йыллыкъ яшны яшавун къыркъгъан адамны шарт булан 1,5 йылгъа эркинликден магьрюм этмек деген  къарар чыгъаргъан болгъан. Шо къарарны уллу адилсизликге гьисаплап, яшны атасы оьз тёресин гесген.

 

Алав АЛИЕВ