Дагъыстанда да, уьлкебизни оьзге регионларында йимик, «Мюлк есини гюню» деген Бютюнроссия проектни талаплары яшавгъа чыгъарылагъанлы арадан 10 йыл тамамланды. Юбилей болжалны алдында «Дагъыстан» деген республика маълумат агентлигинде ДР-ни баш яшавлукъ пачалыкъ инспектору Сергей Касьянов оьзюню прес-конференциясында бу гезик юбилей проект нечик оьтгерилежеги гьакъда журналистлеге баянлыкъ берди.

 

– «Мюлк есини гюню» деген Бютюнроссия юбилей проект бу гезик апрель айны башындан тутуп,  июн айны 13-не ерли давам этилежек, – деди Сергей Владимирович. – Эсгерилген проектни оьлчевюнде кёп квартирлик уьйлерде яшайгъан есилери булан байлавлукъда управляющий компанияланы башчылары къоллавчулар не йимик яшавлукъ-коммунал къуллукъларындан къыйыкъсытылагъанын аян этмек учун умуми жыйын­лар оьтгережек. Шогъар байлавлу болуп толу маълумат «Госуслуги. Дом» деген Интернет бокъчада толу кюйде англатывлар береген материаллар ерлешдирилген. Муна шо саялы да гьар мюлк есиси оьзлер учун ­онгайлы уьйде туруп онлайн-жыйында ортакъчылыкъ этмеге имканлыкъ береген электрон къуллукълардан пайдаланмагъа ва уьйренмеге герек.

Белгили болгъаны йимик, савлай Дагъыстанда кёп квартирлик уьйлени умуми санаву 4815-ге етишген. Тек не этерсен, шоланы барысында да управляющий компаниялар етишмей. Барлары да борчларына сувукъ-салкъын янаша. Натижада, къоллавчулар чакъда-чакъда яшавлукъ-коммунал къуллукъларындан магьрюм къала. Неге тюгюл, оьз заманында къуллукъланы береген къурумлар булан байлавлукъда тийишли дыгъарлар этилмей. Этилинген дыгъарланы шартлары да къоллавчуланы толу кюйде рази къалдырмай. Неге десегиз, этилинеген къуллукъланы сан яныны даражасы тёбен. Уьстевюне, уллу ремонтгъа харлы кёп квартирлик уьйлерде яшайгъанланы арзаларына да толу тергев етишмей.

Прес-конференцияны барышында   регионну яшавлукъ баш пачалыкъ инспектору журналистлер берген соравлагъа да жавап­лар къайтарды.

–Арт вакътилерде савлай Дагъыстанда йимик тахшагьарыбызда да къоллавчулар электрик токлар планлы кюйде  къайтарылып яда буса бир балагьгъа тарып къайтагъаны къачан токътажакъ? – деген соравубузгъа да: – Республикабызны электрик хозяйствосун толу кюйде янгыртыв ишлени 2027-нчи йылгъа тамамламагъа гёз алгъа тутулгъан, – деп жавапланды. – Гертиден де, шо саялы уьй-мюлк есилерини янындан кёп разисизликлер тувулуна. Шоланы гьисапгъа алып, яшавлукъ инспек­цияны сиптеси булан агьамиятлы къуллукъларындан ­къыйыкъсытылагъаны саялы арадан оьтген бир йылны ичинде къоллавчулагъа 10 миллион манаты къайтарылгъан, – деген ёрукъда жавап да алдыкъ.

 

Къ. КЪАРАЕВ.