Оьктем болма гьакъыбыз бар

Бугюнлерде Украинада фашизмни, миллетчиликни алдын алмакъ, олай да ону халкъын ва топурагъын душмандан азат этмек учун юрюлеген хас асгер гьаракатда бизин Къарабудагъгент юртдан баргъанлар да намуслу кюйде оьзлени борчларын кютелер.

Шоланы арасында Адил Ниъматуллаев де бар. Ону атасы Изамутдинни, анасы Зугьраны агьлюсюнде беш яш ким де сукъланагъан кюйде тарбияланып оьсген. Адил – оланы бириси.

Ол Къарабудагъгентдеги 5 номерли орта школаны охуп битдирген. Школадагъа йылларындан тутуп, Адил оьзюню хасият, къылыкъ битимине гёре тенглилеринден эсе артыкъ гьаракатчы, чарчымлы яш гьисапда гёрсетмеге болду. Школада оьтгерилеген гьар къайсы гьаракатда да, гьар тюрлю дарслардан юрюлеген олимпиадаларда да жагь кюйде ортакъчылыкъ этип турду. Школаны битдирип чыкъгъан сонг ишге къуршалып, биринден-бири гиччи яшлар тора­йып гелеген агьлюде оьзюню ата-анасына кёмек къолун узатгъан.

Адил Ниъматуллаевни асгерге къуллукъ этмеге ча­къыргъандан берли, ол ракет асгер бёлюкде къуллукъ эте. Ватандаш борчун кютмеге гиришген гюнден 6 ай оьтген сонг, ол дыгъар байлап, ­оьзюню асгер бёлюгюнде буссагьатгъы вакътиде де къуллукъ этип тура.

Бизин уьлкени Савутлу Гючлери Украинада хас асгер гьаракатны юрютмеге башлагъан биринчи гюнлеринден тутуп, Адил Ниъматуллаев оьзю къуллукъ этеген асгер бёюгюню командирлери алгъа салгъан тапшурувланы къоччакъ ва уьлгюлю кюйде кюте.

Бир башлап ол Чернобыль бойларда юрюлеген дав гьаракатларда ортакъчылыкъ этген. Шондан сонг оланы асгер бёлюгю Изюмов бойгъа бакъдырылгъан. Сосновка юрт ва Бахмут шагьарны азат этивде юрюлген гючлю давларда болгъан. Бугюнлерде буса ол – Донецк бойларда.

Адил Ниъматуллаев къуллукъ этеген дивизионну командири майор Айнур Илнурович Сафан ол тапшурувланы кютеген кюйге булай къыймат бере: «Душман бизин асгер бёлюклерибизге барагъан ягъар¬лыкъ-майлав материалланы къыркъмакъ, алдын алмакъ учун машинлени колоннасына миномётдан таба гючлю атышыв башлагъан. Шо колоннаны ичинде Адил Ниъматуллаев де оьзюню машини булан бизин асгерлеге ягъарлыкъ элте болгъан. Младший сержант А. Ниъматуллаев къоччакълыгъын, къайпан-майгъанлыгъын, бажарывлугъун гёрсетип, оьзю гьайдайгъан машинни бир де арасы бёлюнмейген кюйде урулуп турагъан топ гюллени ичинден чыгъарма болгъан. Шолайлыкъда, тувулунгъан къоркъунч­лукъдан чыкъмагъа амал этип, оьзюне тапшурулгъан машин булан ягъарлыкъны эсен-аман тувра ерине етишдирген. Шондан къайры да, савлугъуна къоркъунчлукъ тувулунуп турагъангъа да къарамайлы, бёлюкню дав техникасына ягъарлыкъ етишдирмеге болгъан. Юрюлюп турагъан хас дав гьаракатны вакътисинде Адил шолай 50 керенден де артыкъ рейс этген. Шону натижасында бизин асгерлеге дав техника учун 170 тондан да къолай ягъарлыкъ етишдирген. Оьзюне тапшурулгъан ишни уьлгюлю, къоччакъ кюйде кютюп яшавгъа чыгъаргъаны саялы, Адил Ниъматуллаев РФ-ни Оборона министрини 1092 номерли буйругъу булан гетген йылны сентябр айыны 2-синде «За воинскую доблесть» деген экинчи даражалы медаль булан савгъатлангъан. Адилге шо медальны дав шартларда асгер бёлюгюню командири гвардия полковник С.Ильин тапшургъан.

Адил Ниъматуллаев оьзюню замандашларына тувуп ­оьсген элин оьз халкъын нечик якълама тюшегенине уьлгю гёрсетип, душман булан дав эте. Ол Ватанына берген антына аминлигин сакълагъан.

«Биз, Къарабудагъгентдеги беш номерли орта школаны бары да муаллимлери, охув ожакъны ёлбашчысы Элмира Жамалутдинова булан бирче бизде охуп чыкъгъан улангъа берилген оьр Пачалыкъ савгъаты булан оьктем болабыз. Адилни шо иш савгъаты булан къутлай туруп, ата-анасына буса шолай къыйынлы гюнлер гелгенде бир де къоркъув билмейген кюйде иш гёрмеге бажарагъан уланны тарбиялагъаны саялы оьзюбюзню ра­зилигибизни билдиребиз. Украинадагъы дав пелекет битип, бизин асгерлеге къуршалгъанлагъа барысына да фашизмни, миллетчиликни башын янчып, уьстюнлюк булан эсен-аман ожакъларына къайтма насип болсун демеге де сюебиз».

Къазимагьаммат ЗАЙНАЛОВ,
Къарабудагъгентдеги
5 номерли орта школада тарихден дарс беривчю, Дагъыстанны ат къазангъан муаллими.