Бугюнлерде Россияны бары да орта охув ожакъларында бирлешген пачалыкъ экзаменлеге гьазирленив юрюлюп тура. 9 ва 11 класланы охувчуларына ЕГЭ ва ОГЭ экзаменлени беривде оьзлени билимлерин алданокъ тергеп къарамагъа имканлыкъ берилген. Дагъыстан Республиканы билим беривню оьсювюню институтунда сынав экзаменлени герти экзаменлеге  инг ювукъ шартларда язмагъа болардай онгайлыкълар яратылажакъ.

 

Сынав экзаменлени оьтгермекни аслу мурады охувчуланы билимлерини даражасын арагъа чыгъармакъ, унутгъан яда эсге алып болмагъан темаланы бирдагъы гёзден гечирмек. Сынав экзаменде «Педагогика оьлчевлени федерал институтунда» ойлашынгъан тапшурувлар  берилежек. Шолар герти ЕГЭ-де ва ОГЭ-де эсгерилеген тапшурувлагъа ва башгъа тергев ишлеге къыйыша.

Охувчулар сынав экзаменлени шу дарслардан: орус тил, математика, история, обществознание, физика, география, информатика, ингилис тил (языв бёлюгю) бермеге бола.

Дагъыстан Республиканы билим беривню оьсювюню институтуну прес-къуллугъу билдирген кюйде, сынав экзаменлерде ортакъчылыкъ этген охувчулар герти экзаменлерде кёбюсю гьалда охувчуларда  болагъан гьалекликге тюшмежек.   Шолай да экзаменге берилген вакътини тюз кюйде къолламагъа уьйренежек.

Сынав экзаменлерде ортакъчылыкъ этмек учун ДИРО-ну сайтында арза бермеге тюше.

 

П. БЕКЕЕВА.