Миналы халкъланы байрамы

Шо гюнню байрам гьисапда белгилемек 2012-нчи йыл 26-нчы октябрде Дагъыстанны халкъларыны съездинде къарар чыгъарылгъан. Шо сипте Евразияны халкъларыны Ялта шагьарда оьтгерилген съездинде де 2013-нчю йыл 10-нчу августда якълав тапгъан. Миналы миллетлени гюнюн оьтгереген къурум комитетге къумукъланы вакили Гьажи Мирзаев башчылыкъ эте. Дагъыстанны миналы 28 тюрлю халкъыны арасына аварлар, агуллар, акъкъыйлар, андилилер, арчилер, ахвахлар, багалуллар, бежтилилер, ботлихлилер, гинухлулар, годоберилилер, татлар, гунзаблилер, даргилилер, дидойлулар, гьайдакълылар, караталылар, гюбечилер, къумукълар, лаклар, лезгилер, ногъайлар, рутуллар, табасаранлылар, тиндиблилер, хваршинилер, цахурлар, чамалалылар гире.

Магьачкъаланы «Пирамида» деген центрында оьтгерилген миналы миллетлени ёлугъувунда шо агьвалатны къурум комитетини председатели Гьажи Мирзаев оьтгерилеген чараны гёз алгъа тутгъан мурадын эсгерип сёйледи: «Бу байрам Дагъыстанны халкъларын бир-бирине дагъы да ювукъ этмек учун оьтгериле. Шо – кёп миллетли Дагъыстанны битмейген байлыгъы».

Милли политикагъа къарайгъан министрни заместители Багьанд Магьамматов оьзюню сёйлевюнде айтгъан кюйде, дагъыстанлылар гьар девюрде де халкъланы бирлешдиреген гюч гьисапда белгили болгъан. Гьар миллетни оьзтёрече адатлары болса да, къыйынлы гюнлер гелгенде, олар бирикген ва елевчюлеге, душмангъа бирче къаршы тургъан.

Сёйлевлер гьар миллетни фольк­лор ва чебер иш гёреген вакиллерини йырлары, бийивлери, макъамлары, тюрлю-тюрлю оюнлары булан аралаш узатылды.

А.Гьамзаев.

Суратда: байрамдан гёрюнюш.


Авторизация
*
*
Регистрация
*
*
*
Согласны с условиями сайта?
Генерация пароля