Мигьраж гече

Ражап айны 27-нчи гечесине чыгъагъан гече Аллагьны Ахырынчы Элчиси Магьаммат Пайхаммар (аллагьисалам) кёкге – Мигьражгъа чыкъгъан. Мигьраж – Яратгъан Есибиз Уллу Аллагь Магьаммат Пайхаммаргъа (аллагьисалам) этген абур болгъан. Бу йыл шо сыйлы гече февраль айны 7-синден 8-не чыгъагъан гечесине рас геле.

 

Шо гече гьар бусурмангъа да инг сыйлыларындан бириси гьисап­лана. Неге тюгюл, дин алимлер токъташдырагъаны йимик, шо гече Магьаммат Пайхаммар (аллагьисалам) булан  эки муъжизат болгъан. Шоланы биринчиси Ол  Маккадан Иерусалимге этген сапары булан байлавлу. Бир-бир бусурман китапларда айтылагъан кюйде, ахшам вакъти намаз да къылып, Магьаммат Пайхаммар (аллагьисалам) Каабаны темиркъазыкъгъа бакъгъан тамыны  ювугъунда ял алып турагъан вакътиде малайик гелген. Ол бир де авуртдурмайлы  Магьаммат Пайхаммарны (аллагьисалам) кёкюрегин ярып, юрегин алып, нюр булан толтуруп, ерине къайтаргъан.

Шондан сонг, аргъумакълардан да юз керен чалт ёл алагъан эки къанатлы Буракъ кёкден тюшюп гелген. Шо гюн ахшам ол Магьаммат Пайхаммарны (аллагьисалам) Иерусалимдеги бусурманланы аль-Акса межитине етишдирген. Жабрайил малайик гелип, Огъар  сютню де, чагъырны да къайсын буса да биринсин тангламагъа таклиф этгени Магьаммат Пайхаммар (а.с)  булан шо уллу гече болгъан экинчи муъжизат болуп токътай. Магьаммат Пайхаммар (аллагьисалам) сютню танглагъан сонг Ол Аршгъа чыкъгъан.

Мигьражда Магьаммат Пайхаммар (аллагьисалам) бир башлап етти кёклеге гётерилген, сонг Ол гьеч ким гётерилмеге болмасдай оьрлюклеге чыкъгъан. Адамны гьакъылы инанып битмесдей, етип болмасдай кёп-кёп муъжизатланы, демек, кёклердеги Каабаны, женнетни, жагьаннемни, Аршны, Курсну ва хыйлы оьзгелерин гёрген.

Гьар кёкде Ол оьзюне салам береген пайхаммарланы гёрген. Шондан сонг Ол пердевсюз Яратгъан Есибиз Уллу Аллагь булан сёйлеген. Бу тамаша гече Ярат-гъаныбыз бусурманлагъа гьар гюнлюк беш намазны да борч этген.

Мигьраж гечесинде ата-ананы, къардашланы ва оьзге айланабызда яшайгъан адамланы сююндюрмеге къаст этмеге тюше. Оланы арасында гечмеге тарыкълар бар буса, гечип, къылынмагъан намазлар бар буса,  мекенли кюйде шоланы, олай да 20 ракаат сюннет намазланы къылмагъа, гери урулагъан амаллардан арек болмагъа гьаракат этмеге тарыкъ. Айрыча алгъанда, чагъыр, гьаракъы ичивден сакъланмаса ярамай. Булай да, бусурманлагъа эсиртеген ичкилер гьарам этилген. Сонг да, шо уллу гече къавгъалап айланмагъа да тюшмей. Шо сыйлы гечени бизин Магьаммат Пайхаммар (аллагьисалам) болгъан чакъы кёп салават салып, Яратгъан Есибиз Къудратлы Уллу Аллагьгъа ибадат этип, товбагъа тюшюп йибермеге маслагьатлы.

 

Насрулла БАЙБОЛАТОВ.

 

Авторизация
*
*
Регистрация
*
*
*
Согласны с условиями сайта?
Генерация пароля