Дагъыстанны маданият минис­терлигинде май айны байрамларын оьтгеривню масъалаларын арагъа салып прес-конференция оьтгерилген. Шонда Дербентдеги археология музейни директору В.Чесноков, авар театрны директору М.Бисавалиев, Къумукъ театрны директоруну за­мес­тители З.Алиев, поэзияны театрыны директору Е.Гьарунова ва оьзгелер ортакъчылыкъ этген. Хас маданият программагъа гёре юрюлеген ишлеге республиканы 38 маданият къурумлары къуршалгъан. Шоланы арасында пачалыкъ музейлер ва оланы филиаллары, театрлар, «Россия – мени тарихим» деген парк, Дагъыстанны маданиятыны ва туризмни оьсдюрювюню центры ва кинотеатрлар эсгериле.

«Сагьнаны усталары–дагъыстанлылагъа» деген проектге гёре де оьт­гермеге гьар тюрлю гьаракатлар гёз алгъа тутулгъан. Май айны бай­рамларын оьтгеривге байлавлу юрюлежек гьаракатланы гьакъында айтгъанда, биринчи майдан 8-нчи майгъа ерли Дербентдеги тарих-архитектура музейде экскурсиялар, выс­тавкалар оьтгерилежек. Респуб­ликаны ватандашларындан къайры, онда уьлкени башгъа ерлеринден гелген туристлер де ортакъчылыкъ этежек.

Май айны 4-нде авар театр «Гиев­лер» деген спектаклни гёрсете. 5-нчи майда Фазу Алиеваны юбилейине байлавлу поэзияны театрында «Атылгъан жагьаннем» деген поэзия спектакль юрюле. 7-нчи майда А-П.Салаватовну атындагъы Къумукъ музыка-драма театрда «Давда той» деген спектакль юрюле. М. Горькийни атындагъы орус театр, къурчакъ театр, къазикъумукъ театр да май айны ял алыв гюнлеринде оьзлени программаларын гёрсетежек.