Эл намус тюшюп Украина бойдагъы хас асгер гьаракатгъа гетген уланлар Къаягент районда аз тюгюл. Оланы кёплерини атлары гьали бизге яхшы белгили. Район администрацияны башчысы Магьаммат Элдерхановну сиптеси булан игит уланланы эсделигине гьар юртда «Эсделикни бавлары тургъузулду». Оланы гьарисинде юзлер булан тереклер орнатылды.

Юртлулар хас гьаракатда ортакъчылыкъ этеген уланларын бир де унутмай. Украиналы миллетчилеге къаршы юрюлеген давларда бизин асгерчилени арасында тас этивлер де ёкъ тюгюл.

Май айда къайгъылы хабар бырынгъы къумукъ юрт Алхожагентге де етишди. Исламбек ва Динара Гьажикъурбановлар уьлкебизни тахшагьары Москвада яшаса да, оланы ата юрту — Алхожагент. Бу агьлюде уьч яш тувгъан ва тарбиялангъан. Яшланы уллусу Магьаммат Гьажикъурбанов яшавун школадан берли дав-асгер касбугъа багъышлай. Ол 6-нчы класдан башлап, Москвада кадетлени корпусуна охумагъа тюше. Сонг Москвадагъы дав-асгер къуллукъчулар гьазирлейген университетде охувун уьстюнлю давам эте.

Университетни битдирип, 2021-нчи йылны сентябрь айын­да Магьаммат Гьажикъурбанов Бурятияда ерлешген десант асгер бёлюкге ротаны командирини заместители этилип бакъдырыла. Оьр хас билимлери, асгер сынаву булангъы яш офицер аз вакътини ичинде оьзюн лап яхшы якъдан гёрсетмеге, алдындагъы асгерчилени сюювюн къазанмагъа бажара. Узакъ къалмай асгер бёлюк Къырым ярым атавгъа бакъдырыла ва Украинадагъы хас асгер гьаракат башлангъан гюн Херсон областгъа гире. Дав тартышывланы вакътисинде Магьаммат Гьажикъурбанов енгил яралана, тек оьзюню асгер къурдашларын ташламай аякъ уьстде къала. Аз да къалмай бёлюкню разведгруппасы хас масъаланы чечмеге алгъа йибериле. Къайтывунда миллетчилеге къаршы бола, гючлю атышывлар башлана. Яш лейтенант къурдашларына тез артгъа, базагъа къайтмагъа буйрукъ бере, оьзю атышывлары булан душманланы токътатмагъа уруна. Шо иш 2022-нчи йылны июн айыны 4-нде болгъан. Магьаммат Гьажикъурбановну анасы Динараны айтывуна гёре, шо гюнден сонг ол уланыны тавушун дагъы эшитмеген.

Десант асгерлени лейтенанты Магьаммат Исламбекович Гьажикъурбанов 23 йыллыкъ чагъында сююмлю Ватанын, халкъын якълай туруп, жанын къурбан этген. Май айда игит лейтенант ата юрту Алхожагентде гёмюлдю. Оьтген хамисгюн ону къабурунда мармардан бичилген эсделик таш гётерилди. Шогъар байлавлу хас чарада игитни ата-анасы, юртлулар, юрт администрацияны башчысы Арсен Османов, Избербаш шагьар-район военкоматыны ёлбашчысыны заместители Абдулгьамит Алимирзаев ортакъчылыкъ этдилер. Ата-анасына игит уланны тарбиялагъаны саялы исси сёзлер айтылды.

 

Магьамматрасул ИБРАГЬИМОВ,

Къаягент район, Алхожагент юрт.