Шо агьвалатгъа байлавлу «Дагестан» деген маълумат агентлигинде 4-нчю февральда болгъан прес-конференцияда агьвалатны онгаргъанланы бириси, ДР-ни Башчысыны ва Гьукуматыны Администрациясыны управлениесини башчысыны коррупция масъалалагъа къарайгъан заместители Алибек Алиев, Магьачкъаланы жумамежитини имамы Магьаммат-Расул гьажи Саадуев, ДР-ни спортгъа къарайгъан министрини заместители, боксдан Олимпиаданы чемпиону Гьайдарбек Гьайдарбеков, дюньяны чемпиону боксёр Солтан Ибрагьимов ва башгъалар ортакъчылыкъ этди.
Автомобиль сапарны гьакъында айта туруп, М.Саадуев булай сёйледи: «Автомобиль сапар бек арив шартларда оьтдю, бир четимлик де болмады. Адамлар ёлда бир-бирин яхшы яндан таныдылар, къурдашлар болдулар. Къабарты-Балкъарияда бизин яхшы къаршыладылар. Оланы межитинде намаз да къылып, Симферопольгъа ёлгъа тюшдюк. Автомобиль сапарыбыз халкъланы бирлешдиреген агьвалат гьисапда болду».
Алибек Алиев прес-конференцияда булай айтды: «Сапар Дагъыстанны халкъларыны бирлигин, оланы арасында татывсузлукъ ёкъну гёрсетди. Шолай адамлары баргъа Дагъыстан оьктем болма бола. Биз сапарыбызны вакътисинде 6 республикадан оьтдюк. Онда яшайгъан халкълар биз этген рагьмулукъ ишни арив гёрюп къарай эдилер. Мен Къырымда гетген йыл да болгъанман, гуманитар мал алып баргъан эдик. Онда яшайгъан халкъ Дагъыстан бизге биринчилей рагьмулукъ къолун узатды деп айтгъанда, оьктем болмай нечик боларсан?»
Къырымны журналистлери, телевидениеси ва Тюркияны телевидениеси шо сапарны гьакъында генг кюйде маълумат бергенлер. «Инаныгъыз, – деди А.Алиев, – 200-ден де артыкъ автомобиль толгъан халкъны бирисинден сама пачалыкъны акъчасына барагъаныкъны гьакъында эшитмедим, мен билегенлер барысы да оьзлени акъчаларына барып гелдилер».
Прес-конференцияда автомобиль сапаргъа байлавлу оьзлени пикруларын айтып прес-конференциягъа гелген башгъалар да сёйледилер ва журналистлени соравларына жавап бердилер.
А. ГЬАМЗАЕВ.
