Фашистлерден азат этилингенли — 80 йыл
Бабаюрт районну школаларында Ленинград шагьар къамавдан эркин болгъанлы 80 йыл битегенликге байлавлу болуп гьар тюрлю чаралар оьтгерилип турду. Шолай артдагъы гюнлерде районну билим берив идараларында «Таби болмагъанлар. Ленинградны фашистлени къамавундан толу кюйде азат этилгенине 80 йыл тамамлана» деген темагъа класдан тышдагъы дарслар оьтгерилди.
Муаллимлер Уллу Ватан давну йылларындагъы тарихни эсинде сакъламакъ яшёрюмлер учун бек агьамиятлы экенни эсгерип, охувчулар булан Ленинград шагьар къамавдан азат этилген кюйню гьакъында лакъырлашыв юрютдю ва онда яшагъанланы къоччакълыгъы, чыдамлыгъы гьакъында айтдылар. Яшлар къагьрулу йыллардагъы кагъызлар булан таныш да болдулар.
Оьтгерилген дарслар уьчге бёлюнген эди: къамавгъа тюшген Ленинградны гьакъында лакъырлашыв, тематикагъа гёре видеороликге къарав ва командалагъа гёре юрютюв. Шо иш охувчулагъа Лениградны азат этив Уллу Ватан давну тарихинде аслу ерни тутагъанны, ону наслудан наслугъа билдирме герекни англатмагъа кёмек этди.
Класдан тышда юрюлген дарслардагъы маълуматлар игитликни ва чыдамлыкъны темасы, Россияны тарихи варислигине абур этмек учун бек агьамиятлы.
Хамаматюртдагъы эки номерли орта школада да Лениград шагьар къамавдан азат этилгенли 80 йыл битегенликге багъышлангъан тарихи дарс оьтгерилди. Школада тарих дарсланы юрютеген муаллим Юсуп Мустапаев эсгерген кюйде, шо дарс охувчуларда шагьарда о йылларда къыйынлыкълагъа тарыгъанланы батырлыгъына, бирлигине, чыдамлыгъына бакъгъан якъдан абур булан янашывну тувдурмакъ ва олай да Уллу Ватан давну йылларындагъы игит халкъны къоччакълыгъын эсинде сакъламакъ мурат булан оьтгерилген.
«Охувчулар видеороликге къарай туруп, дюньядагъы лап да арив шагьарларыны бириси Санкт-Петербургну (о замангъы Ленинградны) 80 йыл алдагъы тарихине сапар этдилер. Дарсны башында яшлар 1944-нчю йылда Ленинградны къуршавдан азат этилгенине багъышланып салынгъан эсделикни гьакъында лакъырлашдылар ва шагьарлылар кёп къыйынлыкълагъа тарып, аш да, сув да етишмейгени саялы, кёбюсю ачдан къырылгъанны, тек ругьдан тюшмегенни, фашистлеге есир болуп бармайлы, гючюн-къуватын жыйып, дав юрютгенни гьакъында билдилер», – деди муаллим.
Таби болмагъан Ленинградны халкъыны къоччакълыгъы гьакъында охувчулар булан дарсны аслу игити, Санкт-Петербург шагьарны гьюрметли ватандашы, къамавгъа тюшген Ленинградда яшагъан Надежда Васильевна Строгонова хабарлады.
Ондан къайры да, яшлар о къыйынлы йылланы гьалын суратлайгъан плакатлар булан да таныш болдулар ва «Ленинградны игитлерине макътав» деген суратны гьакъында пикирлешдилер. Дарсда «Ленинград о заман ва гьали» деген видеоролик гёрсетилди.
Дарсны ахырында Юсуп Мустапаев охувчулагъа Ленинградны къамавгъа алыныву судну къарарына гёре милли къыргъын ва дав жинаятчылыкъ деп токъташдырылгъанны айтды.
Янгы Хасадагъы орта школада оьтгерилген чарада школаны директоруну тарбиялав ишлеге къарайгъан ойчусу А. Магьамматова да 3-10-нчу класларда Ленинградны къуршавдан азат этилгенлигине 80 йыл битегенге байлавлу кино оьтгерди.
«Ленинградны къуршав яшланы гёзюнден» ва «Шыплыкъны къычырыгъы» деген кинолагъа къарагъанча алда, А. Магьамматова ондагъы къайгъылы вакътилени, адамланы къатты ругьуну, къоччакълыгъыны гьакъында айтды. Киногъа къарап битгенден сонг, яшлар оьзлени ойларын аян этдилер.
А. Магьамматованы сёзлерине гёре, шо оьтгерилген чаралар яшланы патриот ругьда тарбияламакъ, таби болмагъан адамлар учун оьктемлик тувдурмакъ, Уллу Ватан давну къыйынлыкъларын эсинде сакъламакъ муратда этилген.
Шо гюн къаралгъан документли фильмлерден ва кинолардан сонг Ленинград шагьарда о къыйынлы йылларда яшагъанланы къысматы яшланы юреклеринден таймажакъны, яшланы кёбюсю гёзюнде гёзьяшлары булан кинолагъа къарагъанны да эсгермеге сюебиз.
Герейхан ГЬАЖИЕВ,
Бабаюрт.
СУРАТДА: чараланы барышы.
