Кёп тюрлю гьаракатлар оьтгерилежек

Бу йыл уьлкеде билдирилген Агьлюню йылыны оьлчевюнде бизин республикада да гьар тюрлю чаралар оьтгерилмеге гёз алгъа тутулгъан.  Шогъар байлавлу Дагъыстан Гьукуматыны Председатели А. Абдулмуслимов республикада шо чараны оьтгеривню  къарарына къол салгъан.  Шолай да, Агьлюню йылын оьтгеривге жаваплы къурум комитет къурулгъан. Умуми гьалда бизин республикада 100-ден артыкъ гьар тюрлю чаралар оьтгерилежек.  Шолар аслу гьалда  Дагъыстан Республикада агьлюню къыйматын артдырмакъ ва якъламакъ учун юрюлежек.

 

Республиканы ватандашлары учун тюрлю конкурслар, марафонлар, спорт ярышлар, оьзге гьаракатлар, шолай да агьлю яратывчулукъ байрамлар, концертлер, етим яшлар учун чаралар оьтгерилме гёз алгъа тутулгъан.

Бу йыл дагъы да «Родные-любимые» деген агьлю форум, «Читающая семья» деген республика гьаракат да юрюлежек.

Агьлюню йылыны айланасында асгер агьлюлени яшларын якъламакъ учун      «Наследники Победы» деген агьамиятлы проектлени яшавгъа чыгъармакъны гьайы этилежек.  Аутизм ва Даунну авруву булангъы яшланы тарбиялайгъан агьлюлени якъламакъны мурады булан «Дети солнца», «Зажги синим» деген проектлер де яшавгъа чыгъарылажакъ деп къаравуллана.

Магьачкъалада бу йыл кёп тармакълы агьлю центр ачылажакъ.

Кёп яшлы агьлюлени ва хас асгер гьаракатны ортакъчыларыны яшлары Дагъыстан пачалыкъ къурчакъ театргъа, музейлеге ва ДР-ни маданият министерлигини башгъа къурумларына гьавайын бармагъа болажакълар.

«Семейный сельский туризм» деген турист маршрут ачылажакъ.

Йылны боюнда «Мать-героиня» деген белги ва «Родительская слава» деген медаль ва орден булан савгъатлангъанланы къутлав чаралар юрюлежек.

 

П. БЕКЕЕВА.

 

Авторизация
*
*
Регистрация
*
*
*
Согласны с условиями сайта?
Генерация пароля