Къурдашлар

(Хабардагъы бары да сёзлер бир гьарп булан башлана)

 

Къаттыгюн. Къышны къагьрулу къадими. Къалкъылагъа къарлар къагъа. Къазанышлы Къасумдан къалгъан Къадир, къадарлы къурдашы Къурбанны къонакълай къаравуллагъан. Къадир къазанышлы къабурланы къаравулчусу. Къурбан Къаратёбедеги къотанда къойлагъа къарай. Къурдашлар къанлы къыргъынларда къылавлу къылычларын къынап, къызбай къачакъланы къувгъан къоччакълар.

Къатынсыз къалгъан къарткъожакъ Къадир къазанны къайнатып, къапулагъа къарагъан. Къарсалай Къадир:

–Къайда къалды къурдашым? Къуллукълары къоймаймы? Къарлагъа къарап, къошуна къайтып къалгъанмы?

Къарай-къарай, къалгъып къалгъан къарт къаравулчу. Къадирни къабургъасына къысдырылып къара къулакълы къырмав да, къуйругъун къурсагъына къаплап къалгъый. Къырланы къарангылыкъ къуршагъан. Къангалы къапуланы къагъагъан къавгъагъа, къырдан Къурбанны къычырагъанына къуванып, Къадир къонагъын къабакъалда къаршылай:

– Къанъявгъур, къайдасан къарт къабан, къайдасан? Къыравлакъларда къоян къувалаймединг? Къурдашынгны къарсалатмайлы-къайнашдырмайлы къоймайсан.

Къурбан да:

– Къурдашымны къаршысында къарабетли къалмасман.

Къызгъанчылагъа къызамукъ къабунсун. Къурдашымны къарсалатгъангъа къыйналып, къайтарышгъа къабакъалдынгда къотандан къувалап, къыркъ къойну къадалтырман.

Къонакъюйде къазанны къаршысында къонушгъанда, къурдашлар къарынчудугъа къарадылар. Къадир къонгуравлу къомузну къолуна къондуруп, къылларын къартыллатды. Къаратангда къурдашланы къурч къавгъасындан къутургъан къырмав къыргъа къачды.

Къыргъынларда къурдашлыкъгъа къатнагъан Къадир де, Къурбан да, къыйынлыкълагъа къайпанмай, къартлыкъны къаркъарасын къуршама къоймай, Къумукътюзге къувун къопса къоркъмажакъ, къартылламажакъ, къаны къалгъынчагъа къарчыгъалардай къаршылагъа къамалажакъ.

 

Алав АЛИЕВ.

 

Авторизация
*
*
Регистрация
*
*
*
Согласны с условиями сайта?
Генерация пароля