Татарстан республиканы тахшагьары Къазанда май айны 21-ден 24-тю болгъанча Мугьамматьярны атындагъы халкъара тюрк адабият фестиваль оьтгерилген. Шонда Россияны тюрк халкълар яшайгъан республикаларындан ва тыш пачалыкълардан кёп санавда язывчулар, шаирлер, адабиятчылар жыйылгъан болгъан.
Дагъыстандан баргъан бизин вакилибиз, Дагъыстанны халкъ шаири Багьавдин Анварович Гьажиев булан лакъыр этебиз:
– Уьч де гюнню программасы гьар тюрлю гьаракатлар юрюле туруп, бек пайдалы оьтдю, – дей ол. – Лап да эсде къалагъан ёлугъувлар Татарстанны гьукуматыны уьюнде, председателини заместители Лейла Ренатовна Фазлеева булан болду. Ол савлай фестивальны барышын къужурлу кюйде къургъан эди ва гьар болагъан ёлугъувларыбызны юрютюп де турду. Ёлугъувда ол: «Къазан шагьар тюрк дюньясына оьзюню кёп жанрлы ва бай адабияты булан тезден белгили. Артдагъы йылларда дос аралыкъларыбыз артагъаны да бизин сююндюре. Антологиялар чыгъарыла, бирликде жыйынлар оьтгериле, маданиятны гюнлеринде пайдалы ёлугъувлар бола. Биз гележекде де шо гьаракатланы узатма къастыбыз бар», – деди ол.
Ёлугъувлар узатыла туруп, Татарстанны тарих, тил адабият институтунда лакъырлашыв оьтгерилген. Шо ёлугъув «Тюрк халкъланы адабияты ва гьалиги заман», деген темагъа багъышлангъан. Бирдагъы ёлугъув «Алтын Урда» деген манежни уллу залында «Ясавини варислиги ва бырынгъы Туркестан» деген выставкада болгъан.
Сонггъу ёлугъув Татарстанны язывчуларыны союзуну уллу залында оьтгериле. Мунда татар тилде чыкъгъан «Тюркский очаг» деген фестивальны ортакъчыларыны асарларындан топлангъан «Халкъланы дослугъу–адабиятланы дослугъу» деген китап малим этиле. Оьктем болуп айтсакъ, китап Багьавдин Гьажиевни асарлары булан башлана. Мунда асарлары ерлешген авторлар оьзлени шиъруларын охуй. Ондан сонг болгъан «дёгерек столда» бирликде иш гёрювню, таржумалагъа ва публицистикагъа тергевню гьакъында сёз юрюле.
Экинчи гюнню ахшамы Татарстанны язывчуларыны союзу къурулгъанлы 90 йыл битегенликге ва Мугьамматьярны атындагъы халкъара тюрк адабият фестивальгъа багъышлана. Агьвалат «Тимерхан» деген уллу ресторанны залында юрюле. Татар язывчулагъа дипломлар, савгъатлар тапшурула, уллу концерт программа гёрсетиле.
Уьчюнчю гюн – Болгар пачалыкъ музейге экскурсия. Бай тарихи булангъы Татарстанда оьзге республикалардагъы адабиятны ва маданиятны чалышывчуларына уьлгю алма кёп агьвалатлар бар. Къазан шагьарда гьар йыл уллу фестиваллар ва форумлар оьтгериле. Татарстан Россиядагъы ва СНГ-деги тюрк халкъланы маданият центрына айланып битген деме ярай.
Я. БИЙДУЛЛАЕВ.
СУРАТДА: Б.Гьажиев тюрк халкъланы фестивалында (ортада).
