Дагъыстанны Оьр судунда Къызлар шагьарда турагъан Магьаммат Агьматовну уголовный ишине къаралгъан.
Судгъа бакъдырылгъан материаллагъа гёре, 2020-нчы йылны май айыны 4-нде М.Агьматов оьзюню тезги танышы булан ёлугъуп, огъар ону къызардашы булан къошулма сюегенин айтгъан. Тек танышы М.Агьматовну оьз тухумуну арасында янгы къардаш гьисапда гёрмеге сюймеген. Шонда буланы арасында эришив-ябушув башлангъан. Ахырда Агьматов тапанча булан башына атышып, къардашы болма сюймеген адамны оьлтюрген.
Этген жинаятчылыгъын яшырмакъ учун, ол оьлген адамны сюегин ювукъдан оьтеген оьзенни ичине ташлагъан. Тек тутулгъан ва Къызлар район судну бугюнлерде къабул этген къарары булан 7 йылгъа эркинликден магьрюм этилген.
Оьр суд шо къарарны гючде къойгъан.
Алав АЛИЕВ
