Гьайбат Салаватовна Шагьмуратова Бабаюрт районну Янгы Хаса юртунда тезден абур да, сый да къазангъан касбучуланы бириси. Ону загьмат ёлу ата юрту ва юртлулары булан тыгъыс кюйде байлангъан. Ол бир вакътини ичинде юрт советни председатели болуп да белсенип чалышгъан. Бугюнлерде буса билим берив тармакъда загьмат тёге. Ол юрт школада тарих дарсланы да юрюте, завучну борчларын да кюте .
10 йылланы боюнда юрт советни председатели гьисапда къурумчулукъ ва жаваплы ишде бай сынав топлагъан. Айтагъаным, ону ишине бакъгъан жаваплылыгъы ва бажарывлугъу муаллим касбусунда да табылгъан.
Ол оьзю юрютеген тарих дарсланы яшлагъа къужурлу ва маъналы оьтгермек учун гьаракат этип чалышагъаны, гьар гюнлюк ишинде янгы къайдаланы излейгени, яшланы билим алмагъа муштарлыгъын артдырмагъа къасткъылагъаны шону герти кюйде исбатлай.
Охувчу яшлар да къайтарышын этегендей гьар тюрлю конкурсларда ва олимпиадаларда ортакъчылыкъ этип, алдынлы ерлеге ес болуп, муаллимин сююндюре. Гьайбат Салаватовна оланы уьстюнлюклери булан оьктем бола. Ол охутгъан уланлар ва къызлар, муаллиминден уьлгю алып, кёбюсю билим берив тармакъда чалыша. Бугюнлерде олар Дагъыстанда ва ондан тышда да дюньяда лап да абурлу ва сыйлы гьисапланагъан муаллимни касбусун юрютелер .
Гьайбат Салаватовнаны оьзюню гьакъында айтгъанда, ол 1958 — нчи йылны сентябр айыны 30-нда тувгъан. Шо замангъы Янгы Хаса юртдагъы 8 класлыкъ школаны битдирип, охувун хоншудагъы Тамазатёбе юртдагъы орта школада узатгъан. Школаны битдирип, Дагъыстан пачалыкъ педагогика институтгъа охума тюшген. 1982 — нчи йылда юреги ушатып танглагъан муаллимни касбусуна ес болгъан. Амма ол къолуна диплом алгъанда, школада ишлемеген. Бабаюрт районну шо замангъы ёлбашчылары ону жагьил чагъына да къарамайлы, юрт советни председатели этип белгилеген. Шо йылларда ону ишге бажарывлугъу ва жаваплы янашаву ачыкъ болуп, аянгъа чыгъа.
Он йылланы боюнда жагьил тиштайпа эренлерден къалышмайлы оьзюне борч этип алгъан къуллукъланы тетиксиз кютмеге бажаргъан.
Арадан йыллар оьтюп, ол яш чагъындан гьасирет болуп, юреги авуп танглагъан касбусуна амин болуп, анадаш школада тарих дарсланы муаллими гьисапда ишге гирише. Аз заманны ичинде ол охувчу яшланы ва иш ёлдашларыны арасында абур да, гьюрмет де къазанма бажара. 2008-нчи йылда буса ону школада завуч этип белгилей. Гьайбат Салаватовнаны ишдеги гьаракаты ва къасты жавапсыз къалмагъан. Ол нече керен РФ-ны ва ДР-ни билим берив ва илму министерлигини Гьюрметлев грамоталарына ес болгъан. 2005-нчи йылда ол « РФ-ни умуму билим беривюню гьюрметли къуллукъчусу» деген белги булан савгъатлангъан.
–Яшланы сюювюн къазанмагъа тынч тюгюл, – дей ону иш ёлдашы Зоя Давутовна, – Мен ташдырып айтмагъа сюемен, Гьайбат Салаватовна тезден яшланы сюювюн де, абурсыйын да къазангъан муаллим. Къысматын яшлар булан байлагъан, терен ва мугькам билимлер береген пагьмулу, оьр категориялы педагог деп айтсам ялгъан болмас. Бу чалт алышынып турагъан девюрде ону йимик касбучулар бугюнлерде бизин билим берив идаралагъа кёп тарыкъ.
Белгили болгъаны йимик, РФ-ны Президентини Указы булан бу йыл Муаллимни ва насигьатчыны йылы деп санала. Насигьатчылар гьисапда Гьайбат Салаватовнагъа иш ёлдашлары, бай сынав топлагъан муаллимлер Дина Моллакъаевна, Кумсият Кайбуллаевна, Садуртдин Салиевич, Зоя Давутовна болуп токътай. Оланы пайдалы насигьатларына Гьайбат Салаватовна агьамият берип гьар заманда да тынглагъан.
Бугюнлерде Гьайбат Салаватовна оьзю жагьил муаллимлени ишине насигьатчы да ва сырдашы да болуп токътай. Неге тюгюл де ол муаллимни касбусуну къыйыныны хадирин бек биле. Нечик де, ол оьзю де муаллимни агьлюсюнде тувуп оьсген. Ону анасы Уркият Абзакаевна Исакова яш наслуну тарбиялавунда ва билим беривде тёкген загьматы учун «Дагъыстанны ат къазангъан муаллими» деген сыйлы атгъа лайыкълы болгъан.
Гьайбат Салаватовнаны эки де къызы оьр билимлер алып, муаллим касбугъа ес. Уллу къызы Аида анасы йимик тарих дарсланы муаллими болуп ишлей. Гиччи къызы Айгюл оьзю танглагъан муаллимни касбусун къоюп бугюнлерде Магьачкъала шагьардагъы МФЦ-ни касбучусу гьисапда чалыша.
Барыбызда билеген кюйде, завучну ва муаллимни бош заманы болмай. Аз заманны ичинде бош мюгьлет тапса, Гьайбат Салаватовна къызыны авлетлери булан ёлукъмагъа ва олар булан заманны оьтгермеге къасткъыла. Бугюнлерде ону кёп сюеген авлетини авлети Абдулмуслим биринчи класгъа охума баргъан. Улланасы ондан сююне ва къувана.
Яллыкъ билмей, оьмюрюн яшлагъа багъышлагъан, бай сынав топлагъан муаллим Гьайбат Салаватовна бугюнлерде юбилейин къаршылай.
Ону тувгъан гюню, сонг да касбу байрамы – муаллимни Гюню булан да къутламагъа унутмайыкъ.Эки де байрамы къутлу болсун деп айтып, огъар ишинде оьрлюклер ва дагъы да уллу уьстюнлюклер, яшавунда савлукъ ва насип ёрайбыз.
Бэлла ГЬАЖИГЕЛДИЕВА.
СУРАТДА: Гь. ШАГЬМУРАТОВА.
