Украина бойдагъы хас асгер гьаракатда болгъанлар учун медицина тергевлерден оьтюп, реабилитация центрларда савлугъун беклешдиривде бир де четимликлер тувулунмагъа тюшмей. Гьалиге бизде СВО-да ортакъчылыкъ этген 225 асгер къуллукъчугъа медицина якъдан кёмек болгъан. Оланы 55-си «Дагъыстан Республикада савлукъ сакълавну реабилитация янын беклешдирмек учун» деген программагъа гёре медицинаны янгы технологияларындан, ясандырывларындан пайдаланып, оьзлени савлугъун яхшылашдыргъанлар.
–Артдагъы 2 йылны ичинде Дагъыстанны савлукъ сакълав программасыны дазуларында 9 медицина идарагъа реабилитациягъа, савлугъун беклешдирмек учун тарыкълы 555 оьр технология ясандырывлар алынгъан. 2023-нчю йылда Республика клиника ва Къызлардагъы шагьар больницаланы кюрчюсюнде Ватанны якълавчуларына биринчи реабилитациядан оьтмеге имканлыкълар болдурулгъан. Савлугъун беклешдиривню биринчи тирети башмайындагъы къантамурларында, къанны ишлевюнде тетиги барлар учун гёрсетилген. Гьали буса 2-нчи республика клиника больницасы да, ветеранланы госпиталы да тийишли оьр даражалы реабилитация технологиялар, аппаратлар булан таъмин этилген. Онда ветеранланы агьлюлерини де савлугъун беклешдирмеге бола,–деп англатды Дагъыстанны савлукъ сакълав министри Т. Беляева.
Гьали буса СВО-дан къайтгъан 219 дагъыстанлы толу кюйде медицина тергевлерден оьтгенлер. Дагъы да 198 хас гьаракатны ортакъчысы медицина къаравлардан оьтмеге герек деп оьзлени гьисабына алынгъан. Бизин Ватан якълавчуланы ва оланы агьлюлерини гезигин гёзлеп турмай медицина къаравлардан оьтмеге ихтияры бар. Шо масъаланы Дагъыстанны савлукъ сакълав министерлиги оьзлени тергевюнде сакълай.
П. ГЬАЙБУЛЛАЕВА.
