Бабаюрт районну ёлбашчысы Даниял Исламов тувра эфирде соравлагъа жавап бере туруп, биринчилей сув масъаланы эсгерди ва бу йылны ахырында район центр ичеген сув булан таъмин этилежегин билдирди.

 

«2022-нчи йылны январ айыны ахырында «ГазИжсети-Техно» деген къурум булан дыгъар байлангъан сонг, Бабаюртну ичиндеги эсгиленген сув быргъыланы янгыртыву башланды. Оьтген заманны ичинде хыйлы иш этилген. Бу йылны ахырына бабаюртлулар ичеген сув булан толу кюйде таъмин этилежек», — деди ол.

Д. Исламовну сёзлерине гёре, эсги сув быргъыланы алышдыргъандан къайры да, юртда дагъы да гьарисинде 600 кубометр сув гьавузлары да булангъы уьч артезиан къуюгъа бурав урулгъан. Тек, быргъыланы алышдырыв ишлер тамамланмагъангъа гёре, олар умуми торуна къошулуп битмеген.

«Халкъгъа сув етишдирмек муратда биз япсарланы тазалап, ювугъунда сув жыйы­лагъан гьавузлар къуруп, олагъа сувну насослар булан берип, сонг юртлулагъа етишдиребиз. Шолай мисаллар бар, амма сувну масъаласын толу чечмек учун, озокъда, акъча маялар да, заман да герек», — деп къошду Даниял Исламов.

Бабаюртдагъы Сатыбаловну атындагъы орамда яшай­гъанланы соравларына жавап бере туруп, районну башы шо орамны ярашдырыв ишлерин оьзюню тергевюню тюбюне алажакъны билдирди.

«Артдагъы йылланы ичинде районну юртларында орамлагъа ремонт ишлер этгенбиз. Амма юртлардагъы сув быргъыланы алышдырыв ишлер битмесе, оланы онгармагъа да бажарылмай», – деди ол.

Даниял Исламов эсгерген кюйде, гетген йыл районда 5 чакъырымдан къолай ёллар ярашдырылгъан. Шолай «Мени ёлларым — мени Дагъыс­таным» деген программагъа гёре Бабаюрт, Мужукъай, Геметёбе, Тамазатёбе юртларда, сонг да 1 номерли Львовский ва Чанкаюртда «Ерли сиптечилиги» деген программагъа гёре орамлагъа асфальт тутулгъан.

Даниял Исламов булангъы тувра эфирде дагъы да оьзге тюрлю масъалалар да арагъа салынды.

 

Герейхан ГЬАЖИЕВ,

оьз мухбирибиз.