7-нчи майда Уьстюнлюкню 79-нчу йыллыгъына багъышлангъан машин юрюш Афгъанистанны ветеранларыны координация советини сиптечилигине гёре оьтгерилди. Бу гезик эсгерилген гьаракат уьч тюрлю къайдада юрюлдю. Айтагъаным, Дагъыстанны Темиркъазыкъ боюнда машин юрюш Къызлар шагьарда, тавда, Цумада районда ва Къыбла Дагъыстанда Дербент районда башланды ва гюнню ахырында Каспийск шагьарда тамамланды. Шону вакътисинде ерлерде жыйынлар оьтгерилди ва Уллу Ватан давда жанын къурбан этгенлени эсделиклерине гюллер салынды.

Темиркъазыкъ бойдагъы машинлени колоннасына Афгъанистанда юрюлген давну ветераны, оьзю де эндирейли Къанболат Салавовгъа ишчи гюпню масъаласы тапшурулгъан эди. Машин юрюш Къызлар шагьарда башланды ва Бабаюртдан, Хасавюртдан, Къызылюртдан, Къоркъмаскъаладан, Магьачкъаладан оьтюп, биз оьрде эсгергенибиз йимик, Каспийск шагьарда тамамланды.

Къанболат оьзюне тапшурулгъан масъаланы ахырына ерли кютегенине шеклик ёкъ. Булай машин юрюш гьаракатны ол бойнуна алагъаны биринчи гезик тюгюл. Дейгеним, ДАССР-ни 100 йыллыгъына, Уьстюнлюкню 78-нчи йылына багъыш-лангъан машин юрюшню де ол толу кюйде яшавгъа чыгъарды.

Машин юрюшде гьаракатчылыкъ гёрсетген уланланы атларын да эсгерме сюемен. ДР-ни Халкъ Жыйыныны депутаты Гьажи Биярсланов, Афгъанистанны ветеранлары солтанянгыюртлулар Муса Аскерханов ва Абдулкъадыр Абукъов, Хасавюртдан – Бекболат Акъавов ва Камил Мусалаев, Алмалыдан – Къураш Алиев не заманда да намусну тюбюне гирип, къол ялгъап, болагъан кёмегин тийдире.

Йырав Насрутдин Насрутдинов оьзюню къурч йырлары булан жыйылгъанланы гёнгюн алды.

 

Алибек САЛАВАТОВ.