Алдагъы гюнлерде тахшагьарда Милли инновация коллежде ана тиллени халкъара гюнюне багъышлап Россияны ат къазангъан артисткасы Бурлият Элмурзаеваны гьакъында язылгъан «По волнам памяти» деген китапны малим этив оьтгерилди. Бу чарада сююмлю йыравубуз Бурлият Эльмурзаевны къурдашлары, къардашлары, коллежни дарс беривчюлери, Дагъыстанны язывчуларыны союзуну правлениесини председатели, Дагъыстанны халкъ шаири Марина Агьматова-Колюбакина, Дагъыстанны халкъ шаири Шейитханум Алишева, Дагъыстанны халкъ артисткасы Зоя Чунаева, Дагъыстанны ат къазангъан артисти Жалав Бекеев, Темиркъазыкъ Кавказдагъы кёп тармакълы гуманитар коллежни къургъан Тавлу Къазакъбиев, эсгерилген коллежни директоруну заместители Нажабат Татаева ва башгъалар ортакъчылыкъ этди.
Жыйында оьзю Бурлият Элмурзаева савлугъуну себебине гёре ортакъчылыкъ этип болмады. Залны ону сураты, китаплар, йырларыны согъув алаты – гитара безеген эди. Жыйын Бурлият Элмурзаеваны «Сени сююп» деген йыры булан ачылды. Шо йырны коллежни 1-нчи курсуну студент къызы Гёзел Аминтазаева йырлады.
Эсгерилген китап орус тилде «Дагъыстан» деген издательствода чыкъгъан. Китапны жамият чалышывчулар Зумурут Дайитова ва Патимат Гьалимова гьазирлеген. Ону бетлеринде Бурлият Элмурзаевагъа багъышлап тынглавчулары язгъан эсге алывлар, шиърулар, белгили къумукъ шаирлер, язывчулар язгъан адабият асарлар бар. Китапны биринчи бетлеринде Бурлият Эльмурзаева оьзю гиччиден тутуп сагьнагъа алгъан биринчи абатларыны, агьлюсюню ва уллу сагьналагъа чыкъгъан кююню гьакъында хабарлай.
Милли инновация коллежни директору Гулияр-Ханум Аминовагъа сёз берилди:
– Бугюн биз сююмлю йыравубуз, Россияны ат къазангъан артисткасы Бурлият Шагьмановна Элмурзаеваны китабын малим этебиз. Бизин булан ортакъчылыкъ этип болмаса да ону йырларын кёп сюебиз, ону яратвчулугъуну теренлигин, гёзеллигин, къыйматын яхшы англайбыз. Б. Элмуразеваны оьзюню яшав ёлуну, яратывчулугъуну ва варислигини гьакъында кёп айтмагъа ва язмагъа бола. Бу китапда ону яшав ва ярытывчулукъ ёлу толу кюйде къуршалмагъан. Мен ойлашагъан кюйде дагъы да берекетли ва уллу китап чыгъармагъа тийишли. Ол гьар заманда да оьзюню янгы йырлары булан бизин сююндюрюп гелген. Ол халкъны сююмлю йыраву. Ону йырларына гьар тынглагъан сайын янгыдан гьашыкъ болабыз. Бугюн бизин булан мунда ортакъчылыкъ этеген къонакълагъа гьакъ юрекден баракалла билдиремен. Бугюн йимик гележекде де савлукъ булан бирче кёп байрамлар оьтгермеге Аллагь савлукъ берсин. Бурлият Шагьмановнагъа да ювукъ вакътини ичинде сапа-сав болуп бизин гезикли ёлугъувларда ортакъчылыкъ этмекни ёрайман.
Коллежни студентлери Бурлият Элмурзаевагъа багъышлангъан шиъруланы къумукъ ва орус тиллерде чебер кюйде охугъандан къайры ону яшав ва сагьна ёлуну гьакъында язгъан эсделиклени малим этдилер.
– Мени атам Тёбенкъазанышдан, анам Бугленден, тек биз Буйнакск шагьарда яшай эдик. Бизин кёп яшлы агьлюбюз бар эди. Мен 9 яшны арасында алтынчысыман. Магъа 4 йыл болагъанда агьлю агьвалатлагъа гёре Хасавюртгъа гёчдюк. Бизин агьлюбюз музыканы сюеген агьлю. Уллу къызардашларым аргъан согъа эди. Гьар тюрлю кружокларда ортакъчылыкъ эте эди, эркъардашым бек арив йырлап гитара согъа эди. Башлапгъы класларда охуйгъан вакътимде мен де гитара сокъмагъа башладым. Школадагъы ахшамларда гитара да согъуп йырлай эдим. Шондан сонг мени гьар тюрлю яратывчулукъ чаралагъа, фестиваллагъа къошма башлады… 1957-нчи йылда Магьачкъалада оьтгерилген республика фестивальда 1-нчи ерни къазандым..
Китапда да язылгъан кюйде 1960-нчы йылда Бурлият Эльмурзаева Москвада отгерилген Дагъыстан инчесаниятны ва адабиятны декадасында ортакъчылыкъ эте. Онда белгили йыравлар Бурлият Ибрагьимова, Муи Гьасанова ва башгъалары булан таныш бола… Сонггъа таба ол нечесе гезиклер Москвадагъы ва башгъа пачалыкълардагъы уллу сагьналагъа чыгъып къумукъланы халкъ ва белгили авторларыны йырларын йырлап къаравчуланы сюювюн къазана.
Жыйында ортакъычылыкъ этгенлер шо гьакъда гьариси оьзлени ойларын айтды. Зоя Чунаева аргъан да согъуп йырлап жыйынны ортакъчыларыны гёнгюн ачды. Жыйын йырлар, бийивлер булан тамамланды.
Патимат БЕКЕЕВА.
