Алдынлыкъ алып къайтдылар, тек…

Белгили экени йимик, бугюнлерде  Бухарестде тутушуп ябушувдан Европаны  гезикли чемпионаты тамамланды. Арбагюн, февраль айны 21-нде, эсгерилген чемпионатда  бизин уьлкени  жыйым командасына къуршалып  ортакъчылыкъ этген  дагъыстанлы кочапланы Магьачкъала шагьарны  аэропортунда оланы дос-къардашы, ерли гьакимлик къурумларыны, олай да министрликлерини,  ведомстволарыны жаваплы къуллукъчулары,  депутатлар къаршылады.

 

Шо гьакъда айта туруп, дагъыстанлы кочаплар  оьтгерилген  чемпионатда экишер алтын, гюмюш ва бронза медаллар къазангъанын  эсгерме тюше. Оланы арасында Агьмат Османов, Гьажимурат Рашитов, Магьаммат Къурбанов, Имам Ганишев, Абасгьажи Магьамматов, олай да  Абдулрашит Садулаев де бар.

Оланы абурун, гьюрметин этип Россияны  Пачалыкъ думасыны депутаты Сайгитпаша Умаханов, Дагъыстанны спортну ябушув журасына къарайгъан федерациясыны ёлбашчысы Омар Муртузалиев ва оьзгелери къутлап сёйлеген. Гележекде оьтгерилеген ярышларда  олагъа оьрлюклер де ёрагъан.

Тек шу ерде, биз тыш пачалыкъгъа чыкъмагъа имканлыкъ берилмегени себепли болуп, бизин кочаплар Завур Угуев ва Къурбан Шираев оьтгерилеген чемпионатда ортакъчылыкъ этмеге болмай къалгъанын разисизлик булан айтмакъны тийишли гёребиз. Неге тюгюл де, буссагьатгъы вакътиде де халкъара оьлчевюнде оьтгерилеген ярышларда  ортакъчылыкъ этмек учун  бизин  спортчулагъа  пуршавлукъ этеген  бир тюрлю себеплер табыла. Бирде  къопдурувсуз айтгъанда, тыш пачалыкъланы янындан къабул этилген  гери урувлар булан бирге, оланы къыйыкъсытывлар узатыла. Бизин республикадан чыкъгъан кочаплар  гьалиге ерли Россияны жыйым командасына къуршалгъандан къайры да, бизин уьлкени башгъа регионлары ва тыш пачалыкълары учун да тогъатартып геле. Оланы кёплери ябушув халчаны  уьстюнде гёрмекли уьстюнлюклеге етишип, бизин республиканы атын данггъа чыгъарып тура. Оьрде  атлары эсгерилген кочаплар да, эгер де, оьзлеге туврадан-тувра тогъаслар салынмагъан буса,  оьтгерилген чемионатны алдынлыларыны сыдырасына къшулажагъы биревде де шеклик тувдурмай эди.  Балики,  шо саялы да  оланы уьстюнлюкге  элтеген ёлун бегитип, оьзгелеге  ел къоймакъ аслу мурат да болгъандыр. Нечик алай да шо гьал ёлгъа йибермеге ярайгъанларындан тюгюл. Бизин  республиканы  физкультурагъа ва спортгъа къарайгъан министрлигине уьлкени оьлчевюнде иш гёреген федерал къурумлар булан бирге шо гьалны тюзлемек учун бир тюрлю чараланы белгилеп, шоланы да артгъа салмай яшавгъа чыгъармагъа тюшедир. Бизин спортчулагъа бакъгъан якъдагъы къыйыкъсытывлар къачан болгъунчагъа узатылып турмагъа тарыкъ экен?!  Кюйге къарагъанда, тыш пачалыкъларда бизин спортчулар, айрыча кочаплар, дюнья оьлчевюнде ярышларда кёбюсю гьалда алдынлы ерлеге лайыкълы болагъанын къабул этмеге болмай. Гери урувлар бизин уьлкени такъсырлав чаралар гьисапда къолланагъаны да гьар кимге де англашылмай тюгюл. Бизин чапланы халкъара  коярышларда ортакъчылыкъ этмеге ихтияр берилмегенин даггъы бир кюйде де  англатмагъа  бажарылмай…

 

Насрулла БАЙБОЛАТОВ

 

Авторизация
*
*
Регистрация
*
*
*
Согласны с условиями сайта?
Генерация пароля