Бабаюрт

Бабаюртдагъы Россияны халкъларыны мердешли маданият центрыны «Тюзню тавушу» деген эргишилени хору «Мени юрегим тавларда» деген Халкъара фольклор фес­тивальда ортакъчылыкъ эте. Фестиваль бугюнлерде Владикавказны лап уллу гезев бавунда оьтгериле.

Центрны башчысы Садия Даветеева билдиреген кюйде, Темиркъазыкъ Осетия – Алания республиканы тахшагьарыны уллу сагьнасындан йырлар чалынажакъдан къайры, жагьил дизайнерлер оьзлени милли опуракъларына гёре тигилген янгы гийимлени гёрсетежек. Халкъ саниятланы выставкасы да болажакъ.
Август айны 13-не ерли узатылажакъ фестивальгъа Къарачай-Чергесни, Ингушетияны, Мычы­гъышны, Дагъыстанны, Къабарты-Балкъарияны, Абха-зияны, Къыбла Осетияны ва оьзге регионланы яратывчулукъ коллективлери чакъырылгъан.

Къызылюрт

Къызылюрт район депутатланы жыйыныны председатели Абду-рашит Магьамматов Санкт-Петербургдагъы РФ-ни милли гвардия асгерлерини институтуну къуллукъчулары Агьмат Гьажиев ва Завур Магьамматов булан ёлугъув оьтгерген.

Ол районну башчысыны атындан офицерлеге баракалла кагъыз тапшургъан ва А.Магьамматов эсгерген кюйде, А.Гьажиев ва З.Магьамматов райондан чыкъгъан хыйлы яшлагъа уьлкени лап белгили оьр охув ожакъларына тюшмеге кёмек этген.
Агьмат Гьажиев Санкт-Петербургдагъы институтну спорт кафедрасыны дарс беривчюсю, айтылгъан спортсмен, самбо ябушувдан дюньяны чемпиону.
Завур Магьамматов институтну курсантларын гьар тюрлю савутлардан атышывгъа уьйретеген центрны начальниги.

Къарланюрт

Къарланюртда (Хасав­юрт район) къурулгъан «Арсланбек» деген футбол команда Ессентукиде 2008-2009-нчу йылларда тувгъанланы арасында оьтгерилген Бютюнроссия ярышларда гьюрметли экинчи ерни алгъан. Турнирде уьлкени гьар тюрлю регионларындан гелген 16 команда ортакъчылыкъ этген.

«Арсланбек» къайсы ярышларда ортакъчылыкъ этсе де, бир де медалларсыз, савгъатларсыз къайтмагъан. Мисал учун, алдындагъы йыл Волгоград областны Волжский шагьарында юрт яшланы арасында оьтгерилген оюнларда 6 команданы утуп, биринчи ерге ес болгъан эди. Евпаторияда, Краснодар крайны Ейск шагьарларындагъы ярышларда да къарланюртлулар оьзлени футбол оюндан гьюнерлерин гёрсетип бажарды.
Дагъыстанлы юрт командагъа къуршалгъан яшланы футболну бары да сырларына тюшюнме сынавлу тренерлер Завур Жанбатыров, Рустам Шелаев ва Юрий Магьтиев уьйрете.

Янгыкъаягент

Къаягент район администрациясында районну юрт вакиллерини Пачалыкъ Думаны депутаты Бийсолтан Гьамзаев булан ёлугъуву оьтгерилген. Ёлугъувда ерли жамият учун агьамиятлы масъалаланы айланасында лакъыр юрюлген.

Озокъда, инг алдын райондагъы пачалыкъ унитар предприятиелени гьакъында сёз болгъан. Белгили кюйде, ДР-ни Малк-мюлк министерлиги оьзюню къарары булан Къаягент райондагъы ГУП-ланы акционер къурумлагъа айландырма токъташгъан. Ерли халкъ шогъар бюс-бютюнлей къаршы ва олар гелтиреген далиллени, гертиден де, гери урмагъа кюй ёкъ. Ондан къайры, депутат булангъы гьакълашывда Къаягентдеги къурулуп битмейген азархананы ва муниципал къуллукъчуланы аз алапаларыны масъаласы да гётерилген.