Ер юзюнде оьсеген гьар-бир терекге боюна, гёрюнюшюне, береген емишине, айланадагъы табиатгъа, жан-жанываргъа, адамлагъа гелтиреген пайдасына гёре къыймат берелер. Амма терекни бары да ниъматлары о оьсеген топуракъдан ва тамуруну тутумлугъундан гьасил бола деп айталар. Озокъда, тамуру болмагъан терек не оьсмей, не емиш бермей. Адамлар да шолай. Етти аталарын ахтарып, танып, билип, эсде сакълап, олар юрютген асил къылыкъланы, адатланы тас этмей, токъташгъан еринде яшавлукъ этеген агьлюлени тамуру бек де бола, терен де.
Бизин Капиркъумукъ юртда тувгъан, оьсген, бир-бирин ушатып татывлу ожакъ къургъан Ибрагьим ва Бурлият Акаевлени агьлю терегини тамурлары да шолай терен, токъташгъан кюю де мекенли. Агьлюню башы Ибрагьим оьзюню айтардай узакъ тюгюл яшав болжалын элге, халкъгъа, юрт жамиятгъа, агьлюге гьалал ва къайратлы къуллукъ эте туруп оьтгерди. Бурлият да юрт загьматдан баш къачырмагъан, бирини артындан бири дегенлей алты яш табып, агьлюсю булан бирге олагъа тарбия-билим берип, языкъ болма къоймайлы аякъгъа тургъузгъанлар.
Бу агьлюде уьч къыздан сонг Дагьир Акаев юрт школада охуп билим алгъан, 1994-нчю йыл 11 класны битдирип, Буйнакскидеги юрт хозяйствону касбучуларын гьазирлейген училищеде шофёргъа охугъан. Узакъ къалмай ону асгерде къуллукъ этме чакъыралар. 1996-1998-нчи йылларда Дагьир Балтыкъ денгиз флотда сувну теренинде бомба къурашдырывну старший оператору, 1 статьялы старшина болуп къуллукъ этген. Асгерден къайтгъанда касбусуна гёре бир мекенли иш табылмайлы, ол ата-анасына кёмек этип, авлакъ загьмат булан машгъул бола.
2001-2007-нчи йылларда Буйнакск шагьардагъы вневедомственный къаравул бёлюгюнде къуллукъ этип тургъан Дагьир Акаевге, дыгъар байлап, Буйнакскидеги асгер бёлюкню сапёр бёлюгюнде иш башлама насип бола. Шо къуллугъунда уьч йыл бою намуслу кюйде ишлеген сонг 2010-нчу йылда ону хас тапшурувланы кютеген айры батальонгъа машин гьайдавчу гьисапда чыгъаралар.
2017-нчи йылдан тутуп, Дагьир Акаев асгер ёлдашлары булан бирге бизин асгерлени Сириядагъы бёлюклеринде хас тапшурувланы кютмек учун алты керен командировкалагъа барып, агьамиятлы объектлени аман сакъланывун болдуруп къайтгъан. 2022-нчи йылны февраль айыны 22-синден тутуп, Дагьир Украина бойда юрюлюп турагъан дав гьаракатларда парахат яшавну токъташдырмакъ муратда белсенип чалышагъанланы ал сыдрасында. Огъар оьзюне нечакъы четим тапшурув берилсе де, ону лап тийишли ерине етишдирип яшавгъа чыгъаражагъына асгер бёлюкню командирлери гьакъ герти кюйде инаналар. Шу пикрубузну дуруслугъуна Дагьир Акаевге намуслу къуллугъу учун берилген он эки медаль ва башгъа савгъатлар нече де арив шагьатлыкъ эте.
Кёп сюеген агьлюсю Дина булан уьй болуп яшай туруп тувгъан уьч авлетини уллусу Солтан бу йыл юрт школаны 11 класын охуп битдирип, атасыны таклифин якълап, Новосибирскидеги оьр асгер училищеге тюшмеге ва гележек яшавун асгерде къуллукъ этивге, Ватанны якълавгъа багъышлама алданокъ гьазирлик гёрген.
Асгер къуллукъчу, токътавсуз юрюлюп турагъан, эки де якъдан урулагъан, атылагъан дав савутланы алдында оьзюн не гьалда тутма герек деген мени суалыма Дагьир енгил кюйде иржайып:
– Ондагъы от-оьртенни ичине гиргенде, о гьакъда ойлашма да чола болмай. Яшынып тургъан еттинчи гьисинг уянып гетип, арты не болур деп къарамай иш юрютесен…− деди.
Ибрагьимни ва Бурлиятны ортанчы уланы Надыр 1987-нчи йыл тувгъан, юрт школаны охуп битдирген сонг Тюмен областда ич асгер бёлюклерде къуллукъ этген. Асгер болжалы битгенде ол Буйнакск район милицияны ич ишлер бёлюгюне тюшюп ишлей. 2011-нчи йылны май айында узакъ йыллар вагьгьабыланы уясы болуп тургъан Къарамахи бойдан къувун гелип, Надыр ёлдашлары булан бирге тюнтювлер оьтгерме шонда бакъдырыла. Шо гюн тапшурулгъан борчун тартынывсуз кюйде кютюп турагъанда, эсде ёкъдан атышыв болуп гетип, Надыр ва ону асгер ёлдашы еринде жан бергенлер. Надырдан ва ону яш агьлюсюнден къалгъан къызы Бурлиятгъа бугюнлерде 12 йыл бола.
Ибрагьимни ва Бурлиятны гиччи уланы – Назим. 2007-нчи йыл орта школаны битдирген ва 2010-нчу йыл асгерге чакъырылып, Мурманск областны Североморск шагьарыны ювугъунда ерлешген Шукозеро юртдагъы асгер бёлюкде радиоэлектрон аппаратны оператору болуп къуллукъ этген. Асгер къуллугъун кютген сонг, арадан бир йыл гетип, ол да контракт байлап Мычыгъыш республикада асгер бёлюклерде къуллукъ этме башлай. 2022-нчи йыл май айны 23-нден ноябрни 24-ю болгъунча ол Украина бойда юрюлеген дав гьаракатларда ортакъчылыкъ этме бакъдырыла ва Херсон, Запорожск областларда, Энергодар атом станцияны боюнда юрюлген миллетчилеге къаршы турувларда артиллерия дивизионну жаваплы миномётчусу гьисапда ортакъчылыкъ эте.
Назим Акаев Россия Федерацияны милли гвардия бёлюклерини федерал къуллугъуну буйругъу булан 2022-нчи йыл «Асгер къуллукъда оьзюн айрыча гёрсетгени учун» деген 3 даражалы ва «Хас дав операцияны ортакъчысы» деген медаллар булан савгъатлангъан.
Алдагъы гюнлерде Назим агьлюсю Марьям, яшлары − 8 йыллыкъ Надыр ва 6 йыллыкъ Асият булан отпускагъа ата юртуна ял алма гелип табылды. Бир агьлюде тувуп, тарбия-билим алып оьсген, яшавда касбуларын ахтарып ёл танглагъан уьч уланны, агъа-инини уьч тюрлю, бир-бирине парх береген ажайып къысматлары бар. Бу уланланы гьариси яшавну маънасын англап, ону четим талапларына бойсынып, гьакъ герти халкъ шаирибиз Йырчы Къазакъ да айтгъанлай: «Эр уланлар намус салмай юрекге, къудратлы къуват гелмес билекге!» – деп, эр намусун, эл намусун оьр даражада кютюп, ата-бабаларыны да, оьзлени де атларын абурдан-сыйдан тюшюрмей сакълама гьазир болуп яшай.
