«Дагъыстанны ДОСААФы – уьлкеде инг къыйматлы бёлюк»

ДОСААФ-ны бёлюклери Россияда 80 регионда бар, шоланы бириси Дагъыстанда иш гёре. Оьтген жуманы ичинде Россияны ДОСААФ-ыны ёлбашчысы Александр Колмаков Сергей Меликов булан ёлукъгъан ва бир нече масъалалагъа къарагъан.

 

Аслу гьалда ДОСААФ пачалыкъны милли аманлыгъын беклешдирив булан машгъул. Шону учун да А. Колмаков региондагъы бёлюк­леге барып, ёлбашчылар булан ёлугъуп, кёп-кёп масъалаланы чече.

Бу гезик де ол Дагъыстанны Башчысы булан яшёрюмлени патриот ругьда тарбиялав, оланы асгерге чакъыргъанча алдагъы гьюнерин артдырыв, ДОСААФ-ны идараларын сакълав, асгер-патриот чараланы юрютюв, яшёрюмлени спорт-техника школаларын, кружоклар ва секциялар ачыв масъалалагъа къарагъан.

А. Колмаков Россия ДОСААФ-ны «Готов к труду и обороне» деген Бютюнроссия физкультура-спорт комплексни барышында ортакъчылыкъ этмеге имканлыкъ барын билдирген.

– Дагъыстанны ДОСААФ бёлюгю уьлкеде инг де къыйматлы бёлюк деп гьисап этиле, – дей А.Колмаков. – Бугюнден сонг сизин кёмегигиз де булан оланы гьаракаты дагъы да яхшылашар деп умут этемен.

Александр Колмаков Дагъыстанны Башчысына баракалла билдирген ва ону «ДОСААФгъа – 95 йыл» деген юбилей медаль булан савгъатлагъан.

Сергей Меликов ДОСААФ-ны гьаракаты булан кёп санавдагъы яшёрюмню патриот ругьда тарбиялама имканлыкъ болгъанын, оьзлени асгер касбулагъа байлагъанын да ерли бёлюкню пайдалы ишиндендир деп, оьзюню янындан баракалла билдирген.

Сергей Меликов ва Александр Колмаков бирлешип ишлевню гьакъындагъы дыгъаргъа къоллар да салгъан. Шогъар гёре тезде Дагъыстанда яшёрюмлени асгер-патриот ругьда тарбиялайгъан центр къурмакъ да гёз алгъа тутулгъан.

Шондан сонг А.Колмаков Россияны ДОСААФ-ыны Магьачкъаладагъы бирлешген техника школасыны базасында оьтгерилген жыйында ортакъчылыкъ  этген.  Эсгерилген чарада ДР-ни Гьукуматыны экинчи бёлюгюню начальниги Сергей Сулейманов, ДР-ни билим берив ва илму, шолай да жагьиллени ишлерине къарайгъан министерликлерини вакиллери, ДР-ни военный комиссариаты ва МВД-ни ГИБДД-сини къуллукъчулары ортакъчылыкъ этген.

Жыйында Россияны ДОСААФ-ыны Дагъыс­тан Республикадагъы регион бёлюгюню председатели Шамил Алиев чыгъып сёйлеген. Ол эсгерген кюйде, Дагъыстанны оборона идаралары гьисап беривню вакътисинде оьзлени план булан гёз алгъа тутгъан тапшурувларыны барысын да яшавгъа чыгъармагъа болгъан.

А.Колмаков Россияны ДОСААФ-ыны Дагъыстан Республикадагъы регион бёлюгюню ишине оьр багьа берген ва Кубок булан савгъатлагъан.

 

Алибек САЛАВАТОВ.

СУРАТДА: Россияны ДОСААФ-ыны ёлбашчысы Александр Колмаков (солда) Шамил Алиев булан.

Авторизация
*
*
Регистрация
*
*
*
Согласны с условиями сайта?
Генерация пароля