Гьали-гьалилерде Къарабудагъгент районну башчысы Магьмут Амиралиев авур атлетикадан тренер Расул Темирбековну гьюрметлев грамота булан савгъатлады. Ол тарбиялагъанлар Дагъыстанны биринчилигин алмакъ учунгъу ярышларда 7 алтын медаль къазанды.
Ярышлар башлангъанча ол «Ярышлагъа 7 яш штангист гелтиргенмен, Паравулгъа шонча алтын медаль да алып гетежекбиз» деген. Ол сёзюнде де табулгъан. Гьали шоланы алтаву Оренбург шагьарда оьтгерилежек ярышлагъа гьазирленип туралар. Бу улан авур атлетикадан Дагъыстанны 11 чемпионун тарбиялагъан.
Яшланы авурлукълар гётермеге уьйретмеге Расул оьзюне 20 йыл болагъанда башлагъан. Ону тренери де ветеранланы арасында дюньяны эки керен чемпиону Алимагьаммат Изиев болгъан.
–Бизин Алимагьаммат оьзюню уьюнде уьйрете эди, ол гечингенде шонда юрюме бажарылмай къалды, – деп эсгере шо гюнлени Расул Темирбеков. – Абзарыбызда алда гьайванлар сакълайгъан араныбыз бар эди, биз кёмеклер булан шону спорт залгъа айландырдыкъ ва шонда тренировкалар этме башладыкъ. Район администрация, Дагъыстанны авур атлетика федерациясыны ёлбашчысы Сайит Абдуллаев спорт алатлар берип де гьар якъдан кёмек этелер. Гьали мени онар яшдан 2 группам бар. Шолар булан тюрлю-тюрлю ярышларда ортакъчылыкъ этебиз.
Шолай даражада ишине берилген улангъа биз дагъы да къуват да, гьаракат да ва оьрлюклер де ёрайбыз!
Бизин мухбирибиз.
