Тутушуп ябушув Дагъыстанда спортну милли журасы гьисаплана. Артдагъы йыллар Къаягент районлу кочаплар, оланы тренерлери республика, Россия ярышларында гёрмекли уьстюнлюклеге етише.
Декабрни 23-24-нчю гюнлеринде Хасавюртда болгъан Дагъыстанны чемпионаты уьстде айтгъан сёзлеримни бирдагъы гертиледи. Бизин якълы оьзлеге 16 йыл битмеген яш кочаплар шоларда 2 биринчи, 1 экинчи ва бир уьчюнчю ерлеге ес болдулар.
57 кило авурлукъда къаягентли тренер Магьамматзагьир Керимханов тарбия-лагъан Агьмат Ибрагьимов 5 керен тогъатартмагъа чыкъды ва барысын да инамлы кюйде утуп, республиканы чемпиону болду. Ону уьстюнлюгюн жавангентли пагьмулу Багьавутдин Алибеков давам этди. 68 кило авурлукъда ол Дагъыстанны чемпиону болду. Халчагъа ол оьз гючлерине бек таянып чыкъды, барысын да утмагъа бажарды. Бизин ягъыбыздан булагъа экевюсюне ва тренерлерине гележек ярышларда янгы уьстюнлюклер ёрайбыз.
Магьамматрасул ИБРАГЬИМОВ.
