Артдагъы йылларда савлай уьлкебизде йимик, бизин республикабызда да ич туризмни оьсдюрювде бар имканлыкъланы толу кюйде пайдаландырывгъа тергев гючлене бара демеге ярай. Шолайлыкъда, Минеральные Воды, Санкт-Петербург, Сочи, Москва шагьарларда ва Калининград областда йимик, Дагъыстангъа ял алмагъа ва геземеге гелеген туристлени санаву белгили кюйде артып тербейгени тергевню тарта.
Дагъысын айтмагъанда, бизин республикабызгъа 2023-нчю йылда май байрамлагъа ял алмагъа къонакълай гелген туристлер 90 мингден къолай болгъан эди… ДР-ни туризмни ва халкъ саниятларыны министерлигини башчысы Эмин Мерданов берген баянгъа гёре, бу йыл май байрамларда ял алмагъа бизин республикабызгъа гелеген туристлени умуми санаву 110 мингден кёп болажакъ деп къаравуллана.
Белгили болгъаны йимик, туристлени авадан пайы оьз мадарына гёре, заманын аяп дегенлей, гьава транспортну къуллукъларындан пайдаланмагъа муштарлы бола. Тек не этерсен, гьава транспортну багьалары йылны ичинде айлана якъдагъы талаплагъа гёре бир нече керенлер алышынагъаны разисизликлени артдыра.
– Артдагъы эки йылны ичинде гьава транспортну къуллукъларындан пайдаланагъан тайпалар учун билетлени багьалары эки керен кёп болгъаны гьакъда айрыча эсгермеге герек, – дей турист компанияны башчысы Халит Омаров. – 2022-нчи йылда билет, Москвагъа барып, къайтып гелмек учун 8 минг манатгъа токътай эди. Гетген йыл гюзде 16 минг манат болду, гьали буса 27 – 28 минг манатлагъа чыгъып тура…
Багьалар шолай артып турса, гьава транспортну къуллукъларындан пай-даланмагъа токъташгъанлар Дагъыстангъа ял алмагъа гелмеге муштарлы болурму дагъы деген сорав тувулуна.
Монополиягъа къаршы иш гёреген федерал управлениесини Дагъыстандагъы бёлюгюню къуллукъчулары аянлашдырагъан кюйде, йиберилген багьаланы алдын алмакъ учун къоллавчуланы базарларында къуллукъланы ва малланы болду-рагъанланы арасында тогъатартывну имканлыкъларын толу кюйде къолламаса бажарылмай. Ёгъесе къыставуллу гьаллар тувулунмагъа имканлы. Шо сынавда да, яшавда да йылдан-йылгъа ачыкъ болуп гёрюне.
Къ. КЪАЗАКЪМУРЗАЕВ.
