25-нчи апрелде Магьачкъалада Уллу Уьстюнлюкню 79 йыллыгъына багъышлангъан «Эсделикни вахтасы» оьтгерилди. ТОКС-ну ортакъчылыгъы булан оьтгерилеген шо чара 1941 – 1945-нчи йылларда  оьлгенлени игитлигини эсделигине, яшёрюмлени патриот ругьда тарбиялавгъа, оланы уьлкени тарихи ва маданият варислигине къатнашдырмакъ учун юрюле.

 

Гьаракат республиканы баш майданында башланды ва Дагъыстанны Гьукуматыны Председатели А. Абдулмуслимов, ону орнунбасарлары, министрлер ва башгъа жаваплы къуллукъланы башын тутгъанлар, школаланы охувчулары, оьзге охув ожакъланы тарбиялавчулары, студентлер ва волонтёрлар оркестр согъулагъан кюйде М. Гьажиевни атындагъы орамдан яяв юрюп, паркгъа бардылар. Мунда Белгисиз солдатны белгисине гюллер салгъандан сонг,  митинг оьтгерилди.

– Гьар йыл оьтгерилеген шу чара, бизин топуракъгъа парахатлыкъ гелтирген уллаталарыбызны эсделигине ва гьюрметине багъышлана, – дей А.Абдулмуслимов. – Бизин республикадан Уллу Ватан давда 180 минг адам ортакъчылыкъ этген, шоланы яртысы дав майданларда къалгъан. Уьстюнлюк алгъанлы 79 йыл бола буса да, дав салгъан яралар гьали де сав болма­гъан, ону белгилери оьзюн унутма къоймай. Гьали-гьалилерде излевчюлер «Сарихумда» 80 йыл алда яллап тюшген самолётну гесеклерин тапдылар. ТОКС-ну ортакъчылары шо яндан уллу иш эте, кёп йыллар белгисиз тас болгъанланы атларын, шону булан  бирге эсделигин къайтара.

А.Абдулмуслимов шулай чаралар яшёрюмлени тарбиялавгъа уллу къошум этегенин эсгерди ва тарихи эсделикни сакълав инг аслу масъала экенни де айтды.

– Тарихни бёттёбен айландырма къарайгъанлар бар, тек яшёрюмлер элни гележеги оьзлерден гьасил экенни англап, шону якъламакъ ва аманлыгъын сакъламакъ учун гьар даим де гьазир турма герек, — деп давам эте А.Абдулмуслимов. – Не ерде де Ватанын жаныдай аяйгъанлар, тангаласыны гьакъында ойлашагъанлар  – элни кюрчюсю деп гьисап этиле. Хас асгер гьаракат юрюлеген заманны ичинде бизин уланлар къоччакълыкъ гёрсетип турагъаны да шону исбатлай.

Митингде шолай да давну ва загьматны ветеранларыны советини председатели Магьарам Алижанов, хас асгер гьаракатны ортакъчысы Майир Рустамов ва башгъалары сёйледилер.

 

Бизин мухбирибиз.