Оьтген йылда йимик бу йыл да Дагъыстангъа лап да кёп ерлер берилген. Сыйлы ерлеге бу йыл бизин республикадан 6 минг адам барма болажакъ.
Шолай да, бу йыл Россияда законлу кюйде яшайгъан тыш пачалыкъланы вакиллери де гьажгъа барма бола. Олагъа 1050 ер гёрсетилген.
Бу жыйынны Федерация Советини председателини биринчи заместители Ильяс Умаханов оьтгерген. 2017-нчи йыл гьажгъа йиберме ихтияры бар турист операторланы списогун да ол белгилеген. Дагъыстанны дин управлениесинден таба гьажгъа «Марва-Тур» йибережек.
Жыйында Россияны тыш ишлеге къарайгъан министерлигини вакиллери, Росавиацияны къуллукъчулары, Россияны бусурманларыны центральный ва регион дин управлениелерини къуллукъчулары ортакъчылыкъ этген. Дагъыстандан муфтийни гьаж ишлеге къарайгъан заместители Мугьаммат-гьажи Мангуев болгъан.
Бизин мухбирибиз.
