Республиканы Башчысы англатгъан кюйде, шо проектни айрокъда Каспий денгизни ювугъунда ерлешген гьукуматларда яшайгъан халкълары ва гьар тюрлю пачалыкъланы туристлери учун да агьамияты бар. Шогъар гёре Каспий денгизге ювукъда ерлешген Россияны, Азербайжанны, Къазахстанны, Иранны, Тюркменистанны ватандашларыны талапларын кютмек, денгизде юзеген транспорт учун онгайлыкълар болдурмакъ гёз алгъа тутулгъан.
Шону натижасында туристлени санаву артажакъдан къайры, Каспий бойда денгиз портланы комплекслери оьсмек бар. Шо да Россияны Гьукуматыны 2014-нчю йылны июн айыны 11-нде токъташдыргъан буйругъуна гёре «Россияны 2030-нчу йылгъа ерли транспорт оьсювю» деген агьамиятлы проектине къошум болажакъ. Ондан къайры да, Россияны да, Тюркменистанны да арасында Каспийде геме ва денгизде юзеген оьзге транспорт байлавлукълар ачылгъан.
Шо проектге гёре Магьачкъаладагъы портда денгизлерде гезейген, юзеген гемелерден адамлар ва маллар учун ерлер къурулажакъ. Олай да, денгизлерде юзеген транспортну техника гьалын тергемек, ярашдырмакъ муратда хас ерлер этмеге гёз алгъа тутулгъан. Ондан къайры да, 300 адамгъа денгиз вокзал, къонакъюйлер къурулажакъ. Шо къурулушлар Магьачкъаладагъы портну къырыйындагъы юклер къотарагъан ерни де, судоремонт заводну да арасында болажакъ.
Бизин мухбирибиз.
