Алдагъы гюнлерде Дагъыстан Республиканы юрт хозяйство ва сурсат министри Мухтарбий Ажеков  «Дагъыстан» деген маълумат агентлигинде журналистлер булан  ёлукъду.  Прес- конференцияда министр Дагъыстанда чалтик къайтарывну  ва къой сиривлени къышлыкъ отлавлукълагъа чыгъарывну гьакъында маълуматлар берди.

М. Ажековну айтывуна гёре, Дагъыстан Республика  Россияда чалтик оьсдюреген  тарлавланы майданларыны санавуна  гёре 2-нчи ерде ва артдагъы йылларда чалтикни  гелими алда бир де болмагъандай артгъан.  Бизин республикада чалтик оьсдюрюв юрт хозяйство тармакъда инг де чалт оьсеген бёлюклени бири гьисаплана.

Чалтик оьсдюрювге бу йыл Дагъыстан Республиканы бюджетинден 1 миллиард манат харж гёрсетилген ва шо юрт хозяйство тармагъыны оьсювюне шайлы болушлукъ этген.

Бу йыл умуми алгъанда Дагъыстанда 31, 6 минг  гектар ерде чалтик оьсдюрюлген ва гьар гектардан 49, 7 центнер гелим алынгъан. Гетген йыл буса гьар гектардан  алынгъан гелим 41 центрнерден артыкъ  болмагъан. Бугюнлеге ерли  Дагъыстанда 150, 5 минг тон  дюгю топлангъан, йылны ахырына дагъы да 5-6 минг тон гелим алмагъа умут этиле. Умуми алгъанда бу йыл чалтикни гелими 156 минг тон болажакъ деп къаравуллана.

Министр берген  маълуматлагъа гёре, Россияда оьсдюрюлген чалтик тыш пачалыкълагъа йибермеге гери урула.  Алынгъан гелимни сакълав ва ишлетив заводлар Къызлар районда 4 бар ва олар барысы да гьалиги заманны талапларына жавап бере. Гелеген йыл республикада чалтик оьсдюрюв майданланы дагъы да артдырмагъа гёз алгъа тутулгъан.

Къой сиривлени къышлыкъ отлавлукълагъа чыгъарывну гьакъында айта туруп министр Ажеков бугюнлеге ерли 1,2 миллион малны чыгъармагъа бажарылгъанны эсгерди. Олар кёюбюсю гьалда Къызлар районда ерлешген отлавлукъларда.  Къалгъан 200-300 минг малны башгъа районлардагъы отлавлукълагъа чыгъарывну гьайы этиле.

 

П.БЕКЕЕВА.