Савлай Россияда бугюнлерде армиягъа бармакъ учун язбашгъы чакъырыв башлангъан. Украинада юрюлеген хас чаралар саялы, ата-аналаны, жамиятны арасында бу масъалагъа рагьатсызланып янашагъанлар бар.

 Алдагъы гюн Дагъыстанны военный комиссары Д. Мустафаев журналистлер булангъы прес-конференцияны вакътисинде шогъар ва оьзге тувулунгъан соравлагъа жаваплар берди.

Биринчилей ол алдагъы йылны гюздеги, къышдагъы чакъырывларыны натижалары булан таныш этди. Ол эсгерген кюйде, оьтген йыл бизден асгерге 3 мингден де артыкъ яш къуллукъ этмеге гетген. Оланы арасындан 2 мингге ювугъуну оьр ва орта хас, касбу билимлери болгъан.

–Бу йылгъы язбашгъы ча­къы­рыв кампанияны гьакъын­да айтсам, – деди Дайитбег Мус­тафаев, – шо апрель айны 1-нден тутуп юрюлюп тура. Гьалиги чакъырывгъа къабул этегенлени санаву, гетген йылгъысы булан тенглешдиргенде, савлай гьукуматыбызда бир нече минглеге кемиген. Оланы санаву 134, 5 мингге етишежек. Темиркъазыкъ Кавказ ва Къыбла округланы тапшуруву булан Дагъыстангъа 3 мингге ювукъ яшгъа ер гёрсетилген. Бизин яшларыбыз Росгвардияда, МЧС-де, башгъа ихтиярлар якълайгъан къурумларда, оьзге военный бёлюклерде къуллукъ этежеклер. Эки мингге ювукъ жагьил асгер-гьисап касбуларда: шофёрлар, инженерлер, фельдшерлер, денгиз касбучулар болуп асгер борчун кютежек. Спорт булан машгъул уланланы спорт роталагъа бакъдыражакъбыз.   Бу чакъырыв апрель айны 1-нден июль айны 15-не ерли узатылажакъ. Дагъыстанны Башчысыны буйругъу булан район муниципалитетлерде, шагьар округларда чакъырыв комиссиялар къурулгъан. Шоланы арасына къошум гьисапда жамият къурумлар да гирежек. Шо буса чакъырывну ачыкълыгъын гёрсетеген бир мисал,–деп билдирди ол.

Д. Мустафаев белгилеген кюйде, армиягъа янгы чакъырылагъан ва асгер борчун кютюп турагъан яшланы Украинада юрюлеген хас чаралагъа бакъдырмажакълар. Ол дагъы да, республиканы военный комиссариат-ларыны кюрчюсюнде гёнгюллю кюйде Украинадагъы хас чараларда ортакъчылыкъ этмеге барма сюегенлер алынып турагъанны англатды.

 

П. ГЬАЙБУЛЛАЕВА.

СУРАТДА: прес-конференцияны вакътиси.