Ана исивюн берип бажаргъан

Гьар авлетни яшаву ананы иржайывундан, татли сёзюнден башлана. Ананы сюювю, ону къакъакъ йырлар йырлагъан асил тавушу, къучакълаву, гьар авлетни эсинден бир де таймажакъ. Бары да яш оьзлеге бу дюньяны ачгъан аналаны гьакъ юрекден сюегенге шеклик ёкъ.

 

Биз бугюн сизин булан таныш этмеге сюеген тиштайпа, оьз авлетлерине чи нечик де, уланкъардашлары гечинип, олардан къалгъан яшлагъа да оьз анасыдай болуп бажаргъан, олагъа да оьз сюювюн етишдирмеге болгъан. Сайида Зубаилова – яш тиштайпа. Шогъар да къарамайлы, ол оьзюню эки де къызын, уллу уланкъардашыны уьч де уланын, гиччисини бир уланын аякъгъа салмагъа бажаргъан.

Сайиданы къысматы бек къыйын болгъан. Ол эрге барып, бир къыз тувгъан сонг, яшаву тюзелмей, айрылмагъа борчлу бола. Оьз авлетин оьсдюрегенни гьайында ол тюрлю-тюрлю ерлерде ишлей. Ону гиччи уланкъардашы Арсланбек асгерге гетген ерде орус къатын да алып яшай. Бираздан олагъа улан тува. Ону да алып, Арсланбек ата юртуна къайтмагъа борчлу бола. 2005-нчи йылда Арсланбек гечине, 6-йыллыкъ уланы Камил буса Сайидагъа къала. Оьзюню къызы булан бирге Сайида ону да оьз авлети йимик сюе ва гьа­йын да эте.

Сайиданы уланкъардашы Арсланбек гечинип, 4 йыллар оьтгенде уллу уланкъардашы Муратбек де авур аврувдан оьле. О заман Муратбекни уьч уланы болгъан: Зубайыр, Жаб­райыл ва Микайыл. Лап гиччисине 6 айлар бола болгъан. Уьч де уланны анасы авлетлерин де къоюп, агьлюден гете. Олар да Сайидагъа тарбиялавгъа къалалар. Озокъда, яш башы да булан Сайидагъа оланы оьсдюрмеге, аякъгъа тургъузмагъа, тюз ёллагъа салмагъа тынч болмагъан. Огъар ону анасы Бакътун да кёмек этген.

Оьзю жагьил экенге толу уягьлюсю де болсун деп, Сайи­да бирдагъы эрге чыгъа. Тек онда да ону яшаву тюзелмей. Къучагъында гиччи Самира да булан ол атасыны ожагъына къайта. Шо замандан берли ол оьзюню яшавун къызларына ва уланкъардашларындан къалгъан уланлагъа багъышлай. Олар ону барысы да оьз анасындан артыкъ сюелер, огъар ана деп айталар. Камил эс тапгъан, уьйленген, оьз агьлюсю, эки авлети де булан яшай, буссагьатда да бары ишин анасына сорап, ону насигьатларына гёре эте.

Биревю уьч улан буса Сайиданы гёрмесе туруп да болмайлар. Оланы ол кёп гиччилейин оьсдюрген, Зубайыр ва Жабра­йыл бугюнлерде школаны да битдирип, охув ожакъларда охувун узаталар, Микайыл буса 9-нчу класда охуй. Зубайыр юртда, Сайиданы янында экенге бек шат, уьйге къайтгъаны булан анасын излей, ол уьйде буса парахат бола. Жабрайыл буса Ставропольда охуй ва Сайи­дадан арекде экенге къыйнала. Оланы гьариси Сайиданы гьакъ юрекден сюелер. Ол оланы оьс­дюрегенде къыйналгъан кюйню уллу бола туруп англайлар, гележекде ону къыйналмагъа къоймажакъгъа сёз бергенлер.

Шолай, оьз авлетлери булан бирче Сайида уланкъардашларыны яшларын да оьзюне исиндирип, олагъа ана сюювню бермеге бажаргъан. Яппа-яш кююнде оьз яшавун шолагъа багъыш­лагъан. Олай аналагъа сав заманында эсделик салмагъа тийишли.

Сайиданы башында гьали де кёп уллу намуслар бар. Оьзюню къызларын да, уланларын да уьйлендирме, уьй-эшикли болсун учун къол узатмагъа герек. Шону таза юреги, асил ана гьислери саялы яшавунда гюч-къуват савгъат болур деп ойлайман.

Сайидагъа яшавунгну маънасы недир деп сорагъанда, ол гёзюнде гёзьяшлары да булан: «Мени яшавум – мени авлетлерим, магъа аманатгъа къалгъан уланларым», – деп жавап берди.

Биз Сайидагъа гележекде сабурлукъ, савлукъ, авлетлери насипли болмакъны ёрайбыз. Гьар ананы авлетлери насипли болса, аналар да шат болажакъгъа шек­лик этмейбиз.

 

Гёзел ГЬАСАНОВА,

Бабаюрт.

 

СУРАТДА: Сайида – авлетлери булан.

 

Авторизация
*
*
Регистрация
*
*
*
Согласны с условиями сайта?
Генерация пароля