Акъча тереклерде оьсмей, оьсе болгъан буса, балики, биз шону герти хадирин де, къыйматын да билмес эдик. Яшав юрютмек учун гьар агьлюде топланагъан маялар — аслу гьалда уьй есилени къаныгъывлу къол, гьакъыл загьматыны натижасы, кёбюсю, исрап этмей, кепекни кепекге уруп жыя.
Бугюнгю шартларда пачалыкъны янындан да финанс масъалалагъа байлавлу янашыв алышынма тюшмейми эди экен деп ойлашаман. Пачалыкъ дегенде, шону атындан гьар тюрлю къурумларда гьакимлик юрютегенлени айтаман. Уьлкебиз хоншудагъы Украинадагъы баш гётергенлеге къаршы турув юрютегени эки йыл бола. Дав деп айтма сюймесек де, хас асгер гьаракат десек де, шо чаралар гьар гюн дегенлей уллу харжланы талап эте. Ондан къайры, гюнбатыш дюнья бизге салмагъан тогъаслар къалмагъан. Айтагъаным, гьалиги четим гьаллар къайсы ёлбашчыны да пачалыкъны маяларына бакъгъан якъда тутумлу, айрокъда жаваплы янашмагъа талпындырмагъа герек эди.
Тек, къарагъанда, тезден теренден тамур яйып гелген мердешлени бир зат да алышдырып болмайгъангъа ошай. Шону мен тюпде гелтиреген мисаллар да гертилей.
Янгыз гетген йыл Дагъыстанны Гьисап палатасы республиканы финанс-бюджет тармагъында 8 миллиард манатгъа ювукъ гьар тюрлю бузукълукъланы тапгъан, 104 материал аманлыкъны къоруйгъан къурумлагъа бакъдырылгъан, 17 уголовный иш ачылгъан. Законланы пешемейгенлени арасында министерликлерден башлап юрт администрацияланы башчыларына ерли бар. Дагъыстанны Ич ишлер министри А.Магьамматов билдиреген кюйде, Республикада экономика булан байлавлу авур ва айрокъда авур жинаятчылыкълар 18,5 процентге артгъан. Урушбатны орта гьисапдагъы оьлчевю 1,4 миллион манатгъа етишген. Оьзюнг ва сени йимик дагъы да хыйлылар алагъан алапалагъа да къарап, булагъа мунчакъы аламат акъчалар къайдан геле экен деген ойгъа батасан.
Муна алдындагъы гюн «Дагэнергону» гезикли директору М.Мугьумаев тутулду. Ол «Россети Северный Кавказ» деген акционер къурумну 2,8 миллиард манатын урлагъан деп айыплана. Республиканы дарбадагъыны чыкъгъан электрик хозяйствосун бир ёрукъгъа гелтирегенни орнунда, законсуз кюйде байынып тургъан. Гьатта оьзюнден алдагъы башчылары да туснакъгъа тюшгенин гьисапгъа алмагъа сюймеген, сакълыкъдан сутурлукъ озгъан.
Уру ва урушбат адам яралгъандан берли оьмюр сюре гелген аламат деп айтыла. Сайки, ону толу кюйде эбинден гелмеге де, алдын алмагъа да бажарылмай. Мен, мисал учун, бизин уллу Ватаныбыз Совет Союзну вакътилерин гёз алгъа гелтирмекни таклиф этер эдим. Эсигизде бар буса, СССР-де пачалыкъны, демек, халкъны кисесине къол сукъгъанлагъа оьлюм суд гесиле эди. Китайда гьали де шо юрюле. Балики, Пачалыкъ Думаны депутатларына да шону айланасында ойлашма заман болгъандыр.
