Роспотребнадзорну Дагъыстан управлениеси республикада болжалы битип къоллама ярамайгъан, гьатта бирлери базлангъан ашамлыкъ малланы сатагъан уллу тюкенлени атларын аян этген. Шоланы арасында «Светофор» (97 мал), «Зеленое яблоко» (246 мал) ва «Магнит» (41 мал) эсгериле.
Тергейген къурумда дагъы да айтагъан кюйде, супермаркетлерде йимик район, юрт тюкенлердеги гьал да бир де къолай тюгюл. Мисал учун, бир-бир тюкенлерде сатылагъан малны шо себепден 30 процентин къапеселерден тайдырмагъа тюше эди.
Болжалы битген маллар айрокъда яшланы савлугъу учун къоркъунчлу. Шоссагьат билинмесе де, гележекде заралы арагъа чыкъмакъ бар. Гьали болгъанча бир зат да болмагъан, энниден сонг да болмас деп айсенилик этип къоймагъыз. Гьар малны къоллама ярайгъан болжалын тергеп чыгъыгъыз, оьзюгюзню ва агьлюгюзню савлугъун аягъыз.
Алав АЛИЕВ
