Февраль айны башында, Хумторкъали районну маданият къаласында Агьлюню йылыны ачылывуна байлавлу байрам концерт болду. Райондагъы маданият управлениени начальниги Залина Сулейманова Агьлюню йылыны ачылывуна  байлавлу  концертге жыйылгъанланы исси сёзлер айтып къутлады. Маданият управлениеси йылны боюнда агьлюге байлавлу этмеге тарыкъ  кёп тюрлю чараланы гёз алгъа тутгъан. Дагъыстанны халкъ шаири Агьмат Жачаев  ва районда террорчулукъгъа къаршы иш гёреген комиссияны баш касбучусу Мина Батрасова  узакъ йыллар дослукъда-татывлукъда бирге яшагъан агьлюлени,  Агьлюню йылы булан къутлап, кёп-кёп лайыкълы сёзлер айтды.

 

Уьлгюлю агьлю бирлигин болдургъан Арсланбековланы ва Алиевлени  шо чара булан къутлай туруп, олагъа грамоталар ва савгъатлар тапшурдулар. Белгили къумукъ йыравлар:  халкъ хору, «Торкъали» деген яшланы бийив ансамбли, «Сарихумну» гиччи артистлери, Маржанат Гьажиева, Мурат Садуев, Гуля Исаева, Умлайла Бадирибова байрамгъа жыйылгъанланы къурчун къандырагъан кюйдеги йырланы йырлады. Агьлюню йылын якълап сагьнада Бамматовланы, Муталимовланы ва Бадирибовланы агьлюлери  де йырлап, оьзлени пагьмуларын гёрсетди. Концертде ортакъчылыкъ этген бары да артистлер гюл байламлар ва грамоталар булан савгъатланды.

 

Жават ЗАКАВОВ.                                                                                                                                        

СУРАТДА: сагьнада «Сарихум» ансамблни бийивчюлери.