Артдагъы йылларда Дагъыстангъа ял алмагъа ва савлугъун беклешдирмеге къонакълай гелеген туристлени санаву артагъаны ачыкъ болуп гёрюне. Оьтген йыл оланы санаву 2 миллиондан айлангъан. Бу йыл дагъы да кёп туристлер гележек деп къаравуллана.
Шо гьакъда гьали-гьалилерде Дербент шагьарда болувунда РФ-ни Президенти Владимир Путин де разилик булан эсгерди. Гележекде бизин республикабызда туризмни оьсдюрювге байлавлу болуп агьамиятлы проектлени оьлчевюнде харж булан кёмек этежегине инандырды.
Дагъыстан Россияда аграр республика гьисапда танывлу. Муна шо саялы да, уьлкебизни регионларыны арасында ич туризмни оьсдюрювде шону аграр тармагъыны имканлыкъларын пайдаландырывгъа да айрыча тергев берилежеги шекликни тувдурмай.
Бугюнлерде Каспий шагьарда Темиркъазыкъ-Кавказ федерал округуну оьлчевюнде юрт ерлердеги ич туризмни оьсдюрювге байлавлу болуп оьтгерилген конференцияны ортакъчылары да аграр туризмни масъа-лаларыны айланасында генг кюйде гьакълашыв юрютдю.
– Дагъыстанны районларында гьалиги заманда аграр туризмни оьсдюрювге байлавлу болуп 100-ден кёп проектлер яшавгъа чыгъарыла, – деди оьзюню сёйлевюнде ДР-ни туризм ва халкъ саниятларыны масъалаларына къарайгъан министри Эмин Мерданов. – Туристлер учун онгайлы къуллукъланы яратмакъ муратда юрюлеген гьаракатда пачалыкъ да асувлу проектлени якълажакъ ва грантлар гьисапда ломай харжлар булан кёмек болдуражакъ.
Юрт ерлердеги аграр туризмни оьсдюрювге байлавлу болуп ДР-ни юрт хозяйство ва сурсат министерлигини къанатыны тюбюнде иш гёреген юрт ерлени оьсдюрювню масъалалары булан машгъул болагъан департаментини директоруну заместители Рената Бибарисова пачалыкъ грантлагъа ес болма муштарлы туроператорлар учун генг кюйде англатывлар берди. Пачалыкъ кёмекни оьлчевлерини ва низамыны гьакъында эсгерилген министерликлени сайтларында толу маълумат бериле, деди ол сёйлевюню ахырында.
Дагъыстанны Гьукуматыны Председатели Абдулмуслим Абдулмус-лимов туроператорлар булангъы гьакълашыв, пикру алышдырыв конферен-цияны ишинде болгъан сёйлевлени жамын чыгъарды. Республикабызгъа гелеген туристлер учун гележекде гьар тюрлю онгайлы къуллукъланы яратмакъ муратда гьаракатын артдырмагъа тюшегени гьакъда бирдагъы да айрыча буварыв этди.
