Россияны Президенти Владимир Путин Федерал Жыйынгъа этген Чакъырывунда «Беш денгиз» деген проектни гьакъында айтды. Шонда  Кас­пий, Балтыкъ, Азов, Къара ва Япон денгизлени бойларында гьалиги талаплагъа жавап береген къонакъюйлери булангъы сав йыл ял алып болажакъ курортлар этмекни арагъа салды. Шо ой яшавгъа чыкъса, йылда ич туризмни 10 миллион адамгъа миндирме имканлыкъ бар.

 

Янгыз Дагъыстанны алып къойсакъ да, 28 къонакъюй, санаторийлер ва яшлар учун лагерлерин этме гёз алгъа тутулгъан. Олар Каспий денгизни бою булан Дербент, Къарабудагъгент, Къаягент ва Магьарамгент районланы къуршай.

Шолагъа бармакъ учун адамлар темир ёл транспорт­ну сайлай. Гетген йыл поездлер булан Дагъыстангъа гелгенлени, гетгенлени ва ичинде айлангъанланы санаву 1 миллиондан да артыкъ болгъан. Бу йыл буса шо санав 650 мингге артмакъ бар.

Аслу гьалда Дагъыстанны ичинде юрюйген поездлени санавун ва вагонларын артдырмакъ масъалагъа да къарала. Хасавюрт – Магьачкъала – Дербент маршрутдагъы поездлеге экишер вагон артыкъ тиркелген. Магьачкъала-Дербент маршрутда буса сав йыл гьар гюн юрюйген кюйде этилген. Дагъыстанны транспорт ва ёл хозяйство министри Жамболат Салавов билдиреген кюйде, рес­публиканы ичинде поезд булан юрюйгенлени санаву 800 мингге етишген. Артдагъы 3 йылны ичинде бир ерге бармакъ учун поездни сайлайгъанланы санаву 40 процентге артгъан.

Вагонланы тиркеген булан да битмей, вокзалланы ва адамлар поездге минеген ерлени де онгарма тюше.

–Поездлени Магьачкъала-Дербент маршрутда юрюйгенлерин бешден он бешге чыгъарма хыялыбыз бар, – дей Жамболат Салавов. – Шо гьакъда бираз алда Дагъыстангъа гелип гетген Россияны экономика оьсювюню министри Максим Решетников булан да лакъыр юрюлдю. Шону учун да  тезде республикагъа 4 янгы поезд йиберилежек, шолар да денгиз бойгъа барагъан шагьарлардан оьтеген маршрутлагъа салынажакъ .

Жамболат Шапиевич эсгереген кюйде, поездлени ичлери янгы къайдада онгарылгъан, олар яйда салкъын, къышда иссилик береген алатлар булан таъмин этилинген. Шондан къайры да, олар са­къат адамлар минип болардай онгайлыкълары булангъы вагонлар болажакъ.

Ол Магьачкъаладагъы халкъара портгъа да айрыча поезд ёл этилежекни ва шонда йылда 30 миллион тон юк йиберме болажакъны да айтды. Шону гьакъында буса биз айрыча макъала онгарарбыз.

 

Гебек КЪОНАКЪБИЕВ.