Пятница, 20.04.2018г. — «ЁЛДАШ».
Апрель айны 17-синде Дагъыстанны территориясында тергев масъалаланы гьакъында прес-конференция болду. Ону барышында «Россельхознадзор» управлениени ёлбашчысы Къурбан Рамазанов, ДР-ни юрт хозяйство министрини заместители Шамил Бахарчиев, ДР-ни юрт хозяйство академиясыны ректору Зайдин Жанболатов, ДР-ни ветеринария комитетини председателини заместители Сергей Попандопуло «Россельхознадзор» управлениени бёлюклерини начальниклери, гелген къонакълар ва журналистлер ортакъчылыкъ этди.
Прес-конференцияны барышында айтылагъан кюйде, «Россельхознадзорну» борчу янгыз тергевлер оьтгермек ва о тергевлерде ёлугъагъан кемчиликлени аян этмек тюгюл, оланы алдын алма да герек. Тергевлер оьтгерилегени алда объектде гьал нечик болгъандан, кемчиликлерден, онда ишлер не даражада юрюлегенден гьасил бола.
2017-нчи йылда алдагъы йыл булан тенглешдиргенде, тергевлени санаву 8 процентге кемиген, тек закон бузулагъан гезиклер буса 20 процентге артгъан.
Шо тергевлер гёрсетеген кюйде, 2017-нчи йылны ичинде 1454 законну бузагъан гезиклер болгъан ва олагъа байлавлу 1438 протокол ва 651 буварыв этилген. 2017-нчи йылда шо тергевлени вакътисинде салынгъан къодуланы къадары 3 миллион 584 манатгъа токътай. 2018-нчи йылны биринчи кварталында 608 минг манатны оьлчевюнде къодулар салынгъан.
Гетген йыл ДР-ни дазусундан бери гелеген ва дазусундан чыгъагъан 6,5 минг транспорт къурал, 2018-нчи йылда 1200 транспорт къурал тергелген. Шо тергевлени натижасында 2017-нчи йылда 448 ва 2018-нчи йылны биринчи кварталында 150 сертификат берилген.
Урлукъчулукъ тармакъда оьзлюгюнден къурулгъан базарлардагъы гьал тергелген. Оланы натижасында административ жаваплыкъгъа 298 адам тартылгъан.
Дагъыстан Республиканы «Россельхознадзор» управлениесинде изну берилегенликге де тергев юрюле. Шолайлыкъда, бу йылны башындан тутуп, 1890 кило изну берилмеген мал аян этилген: оланы арасында Франциядан гелген бузлагъан иргъай (лосось) балыкъ ва Польшадан гелген алма да бар. 2017-нчи йылда Испаниядан гелген мандарин, Тюркиядан гелген памидор, Польшадан ва Италиядан гелген алма, олай да Норвегиядан гелген бузлагъан балыкъ да бар. Бары да шо маллар ёкъ этилген.
