Тарихи маълуматлар аян этеген кююнде, Россияда гюмрюк къуллугъу гьалиден бир минг йыллар алъякъда орус пача Ярослав Мудрыйны девюрюнден бугюнге ерли иш гёре. Озокъда, арадан оьтген вакътини ичинде оланы чалышывунда, борчларын кютювде, яшавунда дегенлей хыйлы-хыйлы къурумчулукъ алмашынывлар, тюрленивлер болгъан. Буса да, шо гюн-бугюн гюмрюк къуллугъуну аслу борчу пачалыкъны аманлыгъын ва пайдаларын якълав болуп токътай.
Россияны гюмрюк къуллугъу янгы девюрде РФ-ни Президентини къарары булан айрыча къурум-комитет гьисапда 2004-нчю йылдан тутуп иш гёре ва 2016-нчы йылны башындан тутуп, Россияны финанс министерлигини табиълигини тюбюнде жаваплы борчларын кютюв булан машгъул.
Биз уьстде де эсгерген кюйде, арадан оьтген вакътини ичинде савлай Россияда, СССР-де ва бютюн дюнья оьлчевюнде тюрлю-тюрлю география, политика ва экономика алмашынывлар болгъан. Айтмагъа сюегенибиз, Дагъыстанда Россияны гюмрюк къуллугъуну биринчи отаву-посту десек де, бёлюгю десек де, бырынгъы Дербент шагьарда гьалиден 200 йыллар алда ишлемеге башлагъан болгъан.
Гертиден де, гюмрюк къуллугъуну коллективи гьар къайсы девюрде де оьзлени аслу борчу гьисапда пачалыкъны экономика аманлыгъын якълап гелген. Бугюнлерде де Дагъыстанны гюмрюгюню къуллукъчулары оьзлени алдына салынгъан жаваплы борчларын инамлы кюте. Шолайлыкъда, гьар йыл пачалыкъны хазнасына 2-3 миллиардлар булан акъча маялар жыйылып къошум этилине.
Шолай асувлу ва хайырлы чалышывда иш ёлдашларына уьлгю гьисапда биз оьзлени атларын айрыча гьюрмет булан эсгермеге сюеген Дагъыстан гюмрюк къуллугъуну башын тутгъан Руслан Ягьияевге, Россияны къыбла дазубой гюмрюк постларында гьаракатчылыкъ гёрсетеген Магьамматсалам Ахаевге, Исабек Агъаевге ва оланы иш ёлдашларына оьз къуллугъунда уьстюнлюклер, савлукъ булан аманлыкъ ёрамагъа сюер эдик.
Байрам гюн, алдан берли де адатлангъан кююнде, гюмрюк къуллугъуну сыдыраларында чалышагъан лап да уьлгюлю къуллукъчулары Росссияны ва Дагъыстанны гюмрюк къуллугъуну башчыларыны янындан материал ва ругь якъдан иштагьландырыла.
Дагъыстанны гюмрюк къуллугъуну башчысы Руслан Ягьияев де оьзлени касбу байрамына багъышланып оьтгерилген ёлугъувда коллективни бу гезик де гьакъ юрекден къутлай ва олагъа оьзюню разилигин билдирип, савгъатлар да тапшура.
