Белгили режиссёрубуз, А-П.Салаватовну атындагъы Къумукъ музыкалы-драма театрны директору Скандарбек Тулпаровгъа о гюнлерде алтмыш йыл тамамланды. Иш ёлдашын къутламагъа театрны савлай коллективи ва юбилярны дос-къардашлары, ювукълары Магьачкъаладагъы М. Горькийни атындагъы Орус театргъа жыйылгъан. Инг башлап юбилярны ДР-ни маданият министри Зарема Бутаева къутлагъан.
– Маданиятны бары да къуллукъчуларыны, яратывчулукъ интеллигенцияны, дагъыстан къаравчуланы атындан сизин гьакъ юрекден къутлайман. Сиз, янгыз Дагъыстанны тюгюл, савлай уьлкебизни де театр дюньясында иш гёре туруп, оьрлюклеге етишгенсиз, атыгъыз данггъа айтылгъан. Россияда да, халкъара театр дюньясында да сизге уллу гьюрмет булан янашагъанына биз сююнебиз. Бизин учун сиз янгыз пагьмулу режиссёр тюгюлсюз, къурдашыбыз да, муаллимибиз де дюрсюз. Яш наслугъа буса насигьатчысыз. Гьали сиз къургъан режиссёр курслар да, Щукинни атындагъы театр училищени битдирип гелгенлер де шону исбатлай. Сизге савлукъ, сабурлукъ, яратывчулукъ ишигизде оьрлюклеге етишмек учун илгьам ёрайман. Маданият министерликни янындан сиз энниден сонг да якълав табажакъсыз,–деген министр.
Сонг орус ва къумукъ театрланы артистлери гьар тюрлю спектакллерден гесеклени къужурлу кюйде ойнагъан, кюлкюлю, масхара гёрюнюшлени гёрсетген, йырлар айтыв, шиърулар охув, бийивлер булан аралашдырылгъан йыбав арив оьтген. Россияны инчесаниятыны ат къазангъан чалышывчусу, критик, театр тарихчи Валерий Подгородинскийден, драматург Нина Мазурдан, Россияны маданиятыны ат къазангъан къуллукъчусу, театр критиги Николай Жегинден гелген къутлав телеграммалар охулгъан.
Ахырда оьзю Скандарбек Тулпаров оьзюне гьакъ юрекден, кёп сююп абур этгени ва къутлагъаны саялы, жыйылгъанлагъа баракалла билдирген.
