Апрель айны 2-синде ДР-ни маданият министерлигинде республика газетлени, журналланы, телевидениени журналистлерин чакъырып прес-конференция оьтгерилди. Театр чалышывчуланы союзуну председатели Айгум Айгумов конференцияны юрютдю ва мунда салынагъан аслу масъаланы гьакъында айтды. Ол билдирген кюйде, апрель айны 22-синден 29-зу болгъанча Дагъыстанда биринчилей милли театрланы халкъара фестивалы оьтгерилежек. Ону оьтгеривню сиптечилери маданият министерлик, Театр чалышывчуланы союзу, М.Горькийни атындагъы орус драма театр арагъа чыгъа.
Етти гюнню узагъында Дагъыстанны театр «майданларында» Россияны халкъларыны милли драматургия ва дюнья классика асарларына гёре спектакллер гёрсетилип туражакъ. Фестивальны конкурс программасында 18 милли театр Къазахстандан, Азербайжандан, Осетиядан, Къабарты-Балкъариядан ва оьзге республикалардан гелип ортакъчылыкъ этежек. Фестивальны сыйлы къонагъы гьисапда Татарстандан гелген Г. Тукайны атындагъы пачалыкъ драма театры да болажакъ. Фестивальда уьч тюрлю номинациялагъа гёре конкурс да оьтгериле: «Уллу оьлчевде лап яхшы драма спектакль», «Лап яхшы камерный моноспектакль», «Лап яхшы музыкалы спектакль». Режиссёрланы арасында гёрмеклиси, эргишини, къатынгишини ролюн яхшы ойнагъанлар, костюмлар этген художникни лап устасы, сценографистни яхшысы белгиленежек ва олагъа жюрини хас дипломлары тапшурулажакъ. Дагъы да, А. Айгумов айтгъан кюйде, сайки, Дагъыстанда оьзлер оьтгерип, фестивальгъа оьзлер багьа да берген деген сёз болмасын учун аты белгили эки театр танкъытчылар да чакъырылажакъ. Журналистлени де ол фестивальны ишини гьакъында генг кюйде язмагъа ва арагъа чыгъармагъа чакъырды.
