Арбагюн, апрель айны 3-нде, Дагъыстанны Гьукуматыны Председатели Артём Здунов бизин республикагъа иш сапар булан гелген адамланы аманлыгъын, гьар тюрлю къуллукълар булан пайдаланагъанланы ихтиярларын якълавгъа къарайгъан федерал къуллугъуну ёлбашчысы, Россияны баш санитар врачы Анна Попова булан Хасавюрт шагьаргъа баргъан. Шо сапарыны вакътисинде эсгерилген шагьарда югъагъан ичек аврувланы яйылывуна байлавлу тувулунгъан гьал булан таныш болгъан.
Олар, инг башлап, шагьарны халкъын бугюнлерде ичеген сув булан таъмин этеген имаратланы гьалын ахтаргъан. Ачыкълашдырып айтгъанда, «Сулакъ» деген насос станциягъа баргъан. «Юбилейное» юртдагъы ичеген сув сакъланагъан имаратлагъа, олай да буссагьатгъы вакътиде бегитилген «Акъташ» деген сув гьавузгъа тергев этген.
Магьачкъалагъа къайтып гелгенде де, олар бизин республиканы тахшагьарыны Киров, Совет районларында яшайгъан халкъын, олай да Ленингент юртну бир пайын ичеген сув булан таъмин этип турагъан Магьачкъала – Миятлы сув юрюйген быргъылагъа къошулгъан янгы къурулгъан станцияда болгъан. Шондан къайры да, Магьачкъала шагьарда яшайгъанлар ичеген сувну тазалайгъан имаратлагъа барып, онда ишлейгенлер булан лакъырлашгъан. Артдагъы вакътилерде сувну сан янын тергемек учун юрюлген ахтарывланы гьасиллери булан да таныш болгъан. Миятлыдан гелеген сувну сан янын яхшылашдырмакъ учун таман чакъы даражада тийишли чаралар гёрюлегенин тасдыкъ этген.
Шондан сонг ДР-ни Башчысы Владимир Васильев оьтгерген генгешде Хасавюрт шагьарда югъагъан ичек аврувланы яйылыву булан байлавлу тувулунгъан гьал арагъа салынып ойлашылгъан. Шону ишинде адамланы аманлыгъын, гьар тюрлю къуллукълар булан пайдаланагъанланы ихтиярларын якълавгъа къарайгъан федерал къуллугъуну ёлбашчысы, Россияны баш санитар врачы Анна Попова да ортакъчылыкъ этген.
Оьтгерилген шо генгешни барышында белгили болгъаны йимик, шагьарда яшайгъанлар таъмин этилеген сувну насланыву югъагъан ичек аврувланы яйылыву булан байлавлу тувулунгъан гьалны аслу себеби болуп токътай. Бугюнлерде бузукълашгъан гьалны яхшылашдырмакъ учун мекенли чаралар гёрюле. Шагьарны халкъын сан янлы таза сув булан таъмин этмек муратда гёрюлеген гьаракатдан къайры да, аврув къабунма бола деп гьисап этилеген ерлерде алдын алыв чаралар, халкъны арасында англатыв ишлер бирликде тувулунгъан гьалны оьрчюмеге, аврувну яйылмагъа къоймай сакълавгъа болушлукъ этген. Демек, Хасавюрт шагьарда югъагъан ичек аврувлар булан авруйгъанланы санаву баргъан сайын кемий.
Арагъа салынып ойлашылагъан масъаланы агьамиятлыгъы гьакъда эсгере туруп, Владимир Васильев Роспотребнадзорну федерал къуллугъуну ёлбашчысыны янындан тувулунгъан гьалгъа, олай да умуми кюйде алгъанда, бизин республикагъа таман чакъы тергев берилгени учун оьзюню разилигин билдирген. Шону булан бирге бизин республиканы ёлбашчылары халкъны сан янлы сув булан таъмин этивню масъаласына гьар къачан да агьамият берип гелегенин ташдыргъан. Налог гьисапда жыйылагъан, олай да бюджетге тюшеген оьзге акъча маяланы къадары шайлы артгъаны бу йыл халкъны сув булан таъмин этивню масъаласын ёрукълашдырмакъ учун 1, 7 миллиард манат бакъдырмагъа шартлар яратгъаны гьакъда билдирген. Сонг да, ДР-ни Башчысы оьзюню сёйлевюнде эсгерилген тармакъда юрюлеген гьаракатны жанландырмагъа тюшегенине жыйылгъанланы тергевюн бакъдыргъан.
Оьз гезигинде Анна Попова да югъагъан ичек аврувланы яйылывуну алдын алывгъа байлавлу ишлер оьз заманында ва оьр сан янлы кюйде оьтгерилгени гьакъда айтгъан. Шону булан бирге, югъагъан ичек аврувланы яйылывуну аслу себеби сувну насланыву булан байлавлу болгъаны гьакъда эсгерген. Ону сёзлерине гёре, сувну сан янына байлавлу этилген тергевлени гьасиллери шону герти кюйде исбатлай. Шондан къайры да, ол уьлкени оьлчевюнде къабул этилген «Таза сув» деген агьамиятлы проектде белгиленген чараланы бизин республикада яшавгъа чыгъарывгъа оьзю болушлукъ этежегине жыйылгъанланы инандыргъан.
Бизин маълумат.
